N年前八方仲係學生嗰陣，學界至巴閉嘅活動，應該係要講德智體群美嘅《溫故知新》，邊似得𠵱家啲學生咁幸福，瓣瓣都話有商界顯關懷，想比乜賽都得。芸芸比賽中，八方最鍾意嘅係堪稱全港最大企業教育課程嘅學生營商體驗計劃，畀班細路過足老闆癮之餘，仲令佢哋知道做生意搵錢唔係咁簡單，應該有助刺激佢哋更加努力讀書，唔再恨快啲踏足社會！

鄭海泉邵銘高教路

主辦單位國際成就計劃香港部（JA）話，今年有75間中學超過1,800個學生參與，喺158個義務商界顧問指導下，班小朋友學到點組織管理層、集資、製造產品、推廣產品、報告業績、開股東會同埋點將公司清盤，7間表現最出色嘅學生公司，噚日喺畢業禮向評判團報告業績，競逐三個獎項。
結果，嘉諾撒聖心書院憑住佢哋間Wa!Fir-niqueLtd.包辦最佳報告演繹獎同埋最佳學生公司，寶血會上智英文書院嘅"Check"ThisOut行政總裁黃慧敏做咗最佳CEO。JA話，75間公司夾埋賺咗14萬，其中27間公司夾埋喺盈利入面捐咗3萬幾蚊出嚟，JA就頒咗個企業公民獎畀佢哋。
但八方覺得最過癮嘅係今年新增嘅影子計劃（JobShadowing），最佳學生CEO慧敏妹妹將會喺「影子工作日」當天，跟住滙豐大班鄭海泉同埋鬼佬CEO邵銘高返工（每人半日），評判團之一嘅滙豐一姐梁高美懿話，佢哋係經過早餐會議、一對一傾偈等程序，先嚴選出慧敏妹妹，咁梗係嚴選啦，淨係過到梁一姐呢關都唔易啦！
至於慧敏妹妹幾時「上班」？梁一姐話未擇日子，因為要夾晒鄭大班、邵SIR同埋小妹妹啲時間……唔知到時大班會唔會喺公餘帶佢去唱K，曾經喺阿根廷大髀中過子彈，一出院就返工嘅邵總裁，又會唔會教佢擋子彈呢？


爆料熱線：29290000、27860099
報料傳真：26239278
報料電郵：[email protected]