倒數四次賽事，三日一夜，季尾感更濃，出操馬數目日趨減少，快跳馬數量亦隨之下降。季尾仍積極操練的馬，目標明確，多是搏開未贏，或經小休後復出。

確有些馬房已呈半收工狀態，等下季，故必須清楚知道，最近有哪數個馬房，仍未鳴金收兵，成績、出馬數量，有得比較，應不難分得出。

徐雨石屬少數，季尾仍有部份積極操練馬，當中絕大多數都未交代，肉緊也正常；今期（7月1日）在沙田出馬多達十匹，季內未勝的佔過半數，第九場「靚紫荊」是其中之一。

近數場，次次輸近，用實際表現說明已漸到位，上仗賽前經過一輪肉緊操練，用麥偉利再跑，已經由無飛變有飛，可惜直路遇上嚴重意外，直路初被撞後便大勢已去。

近仗都輸近的「靚紫荊」，幾乎用晒前、中、後跑法，幾可肯定應已試到好清楚，那樣跑法最好。

復課後操練程序，維持超強積極性，一係唔跳，一跳便被安排拍磨，連拍三課，埋門連人都換埋，轉交李寶利接手。

出跳觀感，比早前又有唔同，情緒越見安穩，常見的急躁感日漸消失，明顯有越來越入局的轉變。

徐雨石季尾仍如此壓逼牠，目的無非想求成績，出賽安排繼續鎖定千四，無轉路程，也是清晰出擊訊息，縱然抽外檔（11檔），但同場有足夠前領馬，只要李寶利不順其自然，沿途走外叠，做好留放，身處此不太強組別，已有機會爭勝。