當年今日
關於我們

專訪丨楊洛婷母女炮製父親節驚喜 老公Tim感恩「富爸爸」令成長更精采

蘋果日報 2021/06/19 00:00

楊洛婷父親節Tim富爸爸Dear Jane黃天翱

港姐楊洛婷和樂隊Dear Jane主音、老公黃天翱(Tim)於2018年貼出帶着女兒黃子霏(Tanya)收豪宅鎖匙的相片,事後爆出Tim背後有「富爸爸」資助。原來,Tim的爹哋黃國輝是資深電影人,初出道時被行內長輩稱呼「輝哥個仔」,不過他在音樂上作出的努力,現在是輝哥被介紹為「阿Tim個老竇」,稱呼逆轉,足見證Tim的演藝成績。
empty
Tim三代同堂慶祝父親節。
empty
Dear Jane主音Tim很感恩父親栽培。
empty
兩父子之間沒有代溝,輝哥很了解兒子Tim。
empty
孫女Tanya親切錫錫爺爺。
empty
楊洛婷母女一齊整父親節蛋糕。
Tim強調沒有爸爸的支持,自己未必行出今日成績。那要多謝「富爸爸」嗎?Tim點頭,他表示爸爸不但曾在經濟上泵水,還樂於把自己豐富的人生經驗做Tim的明燈,令他不用走冤枉路。輝哥指Tim小時候性格內向,甚麼都會禮讓別人,曾擔心他長大後不會保護自己,自幼較寵愛他,買給兒子的玩具亦多不勝數;除了物質不缺,作為廿四孝爹哋的輝哥也會花時間陪伴,「最幸運係我份工唔使朝九晚五,忙一段時間,又會有一段時間休息,可以有好多時間陪仔女,我享受同佢哋一齊做功課,一齊去買餸,全部係快樂回憶。」
父子說話不多,Tim童年時會每日寫一封信給爸爸,分享生活瑣事,輝哥說:「佢唔識寫嘅字就畫公仔表達,我覺得過程中,兩父子溝通得好好。」及至Tim到夏威夷升大學,輝哥親自陪伴飛到當地搞入學手續,這也是Tim第一次離家,輝哥擔心他不會自己照顧起居,臨別不忘在Tim的寓所貼滿memo。童年志願要做汽車工程師的Tim,大學加入敲擊樂團後卻突然迷上玩音樂,回港還組band闖樂壇追夢。
empty
Tim的BB相好得意。(被訪者提供圖片)
empty
Tim小時候我的志願想做一個汽車工程師。(被訪者提供圖片)
empty
Tim童年時愛給爸每天寫信分享生活趣事。(被訪者提供圖片)
empty
輝哥從小給兒子很大自由度和愛。(被訪者提供圖片)

初入行家人接濟

輝哥又是無限支持,Tim回想做新人捱過的辛酸,「一定要屋企人support,最初夾band人工得兩、三千蚊一個月,當然唔夠錢養家,要靠家人,爹哋一直好支持,經濟上幫忙,起碼我出去同朋友飲杯咖啡都唔怕冇錢。」Tim指爸爸並沒有給他任碌的附屬卡,反而是現金。輝哥從來沒想過要孩子在成長過程中吃苦,「我以過來人嚟講,小朋友成長中,首先必要好好保護佢哋,其次係引導佢哋,畀佢哋無限嘅愛,父母能力上可以畀到,都要畀佢哋最好。我唔同意有啲人要小朋友吃苦,要佢哋捱,其實應該畀佢哋開心做自己,佢哋覺得點樣係最快樂,就畀佢哋咁樣生活。」輝哥也不打罵子女,「從來唔會要佢哋必須做啲乜嘢,又或唔准做呢個,唔准做嗰個,只會從旁指引,我唔贊成綑綁式限制,要畀佢哋自己思考,但當然要有基本嘅紀律。記得有次同Tim去打網球,佢輸咗畀我就發脾氣,我話『爸爸打咗30幾年,你只係打咗幾年,點會夠我打』,佢話以後都唔打,我就後悔講咗嗰句說話令佢沮喪,所以自從嗰次後,佢喜歡做乜嘢我都支持佢。」
Tim初出道,輝哥就給兒子打氣:「佢當日返香港話要夾band,我問過佢點解要夾band?我話夾得就要贏,冇得輸,輸咗就乜嘢都冇。」Dear Jane出道時發展停滯不前,成員間有討論過改風格,輝哥就出「錦囊」:「我話唔可以改,我聽過Quincy Jones(美國金牌音樂人)講過一句說話,如果你唔能夠堅持自己嘅風格,而去做一啲大眾化嘅音樂,你一旦跌入大海時就唔會搵到你。如果人哋要聽粵語流行曲,你模仿張學友,佢不如去聽張學友,去聽陳奕迅,佢唔會去聽Dear Jane,你模仿得,就算比人哋更好,都係模仿,一定要保持Dear Jane嘅style、Tim嘅風格,咁先可以持久。嗰段時間佢哋有迷惘,我話一轉就會輸晒!」就是這份鼓勵,Tim堅持建立自己風格。
empty
Tim表示到夏威夷升大學時才愛上玩音樂。
輝哥直認是兒子的忠粉,「我亦同佢講過,無論佢開3個人嘅演唱會,又或者係3萬人嘅演唱會,我都會喺度。記得佢哋紅館開騷,我入後台,睇到佢一個人化好妝坐喺度,我好少見佢咁安靜,我問佢準備好未,佢答我『我喺台上時就準備好』,我覺得佢呢句說話好似老竇,我哋好少空槍上陣,常常都準備好自己。結果3個鐘頭演出係『zero mistake』,佢同台下幾萬人一齊唱,我真係proud of個仔。」Tim聽到這裏即說:「爸爸台下睇到zero mistake,我喺台上有多少錯,我知道嘅!」
empty
Tim笑言自己遺傳了爸爸的基因,甚至小動作都像父親。

光頭爺哨牙爸

兩父子間冇隔膜冇代溝,平日見面閒話家常,一切心照不宣。這次父子對談訪問,卻難得盡訴心中情,「好多嘢我以前冇聽過,今日聽到,我係開心嘅。」Tim直言爸爸非常了解他,「爹哋好似乜都知,佢有時會主動問我近況,畀好多建議,唔使刻意『戳』我先講,就知道晒!」Tim結婚生女,如何愛家庭愛妻女都受父親啟發,「我爸爸很好,佢有威嚴,但亦好善良,我發覺而家我對家庭同做人處事到想法,到一啲小動作,竟越來越似爹哋,真係基因嚟,原來係有遺傳!爹哋嘅支持,令我成長更加精采。」輝哥則相信教學相長,「我喺子女身上都學咗好多嘢,回想當年生咗Tim,我人生第一次做爸爸,都係乜都唔識,慢慢好多嘢就自然學到,孩子生命力好強,我都係喺子女身上學到如何做一個好爸爸。」Tim好奇問輝哥覺得他的表現?輝哥說:「佢乖仔,係good man同good father,連埋做歌手,樣樣都做到120分。」
為了讓兩位爸爸有個難忘父親節,挺着巨肚的楊洛婷仍與3歲多囡囡Tanya炮製驚喜,Tanya除親手用朱古力醬、水果和糖粉等裝飾芝士蛋糕,又送上拼圖卡給爺爺和爸爸,最令Tim和輝哥冧爆當然是Tanya的, kiss。輝哥看着孫女遞上的拼圖卡忍俊不禁:「點解我似一個炸雞老人㗎?點解爺爺光頭㗎?爹哋哨牙嘅?」Tanya頓時被爺爺考起,Tim和輝哥事後大啖吃着Tanya整的蛋糕,滋味無窮,三代同堂好溫馨。輝哥謂從小父子見面必會擁抱,Tim也在訪問後給爸爸一個, hug,這緊緊擁抱猶勝千言萬語。
empty
為了讓兩位爸爸有個難忘父親節,挺着巨肚的楊洛婷仍與3歲多囡囡Tanya炮製驚喜。
empty
Tanya貼爸爸拼圖時,竟把Tim變成哨牙佬。
empty
Tanya是爺爺的開心果。
empty
輝哥大讚孫女弄的蛋糕好味,食唔停口。
empty
楊洛婷下月便會生第二胎。(被訪者提供圖片)
empty
輝哥指Tim小時候文靜,他特別保護兒子。(被訪者提供圖片)
empty
兩父子情深一抱,一切盡在不言中。
撰文:比華利
攝影:陳弘
攝錄:葉君海
場地:RedMR
-----------------------------
蘋果App大升級 更簡潔更就手!了解更多立即下載體驗