「我們的團隊，每一個人都盡了力，希望觀眾也會感受到，因為這個舞台的赤裸裸競爭性，令歌手們互相鞭策，每個星期都渴望做出自己最好的表演，壓力雖然超大但卻讓我們更上一層樓，我很自豪地說，我們都配得上『我是歌手』之名，謝謝所有支持我們的觀眾。」李克勤今早在微博寫道。

噚晚《我是歌手4》祖兒第一輪就遭淘汰，網民個個O晒嘴完全唔知發生咩事，更洗版式狂插湖南衛視有黑幕。有網民儼如專家一樣分析:「大家都熟悉湖南衛視的套路了吧，祖兒不淘汰，那麼李玟就可能要正面和張信哲或者李克勤pk，為了保險起見，祖兒順理成章的成了第一輪的犧牲品！心疼祖兒，那麼的努力，卻輸給了黑幕！還有那個老狼破音團！都破音成那樣了，第一輪都被遭淘汰，憑什麼？」

其實網民對於李玟摘冠反對聲音不大，只係紛紛替祖兒「被犧牲」感不值，而克勤噚晚水準以上的表現，亦令人擊節讚賞，雖然三甲不入，但克勤已感滿足，此刻最掛心，係老闆——老婆同囝囝。

克勤說:「鬆咗一口氣，依家心情好想快啲返屋企見老婆同仔，因為咁唔好彩，啲仔呢幾日發燒，我好擔心佢哋，所以想快啲返嚟。無論屋企發生乜事，唔會影響做嘢，好多謝阿Lam(林子祥)同Sally(葉蒨文)，佢哋係我20幾年好朋友，兩公婆一齊撐我，覺得好被疼錫同好有福氣。」

祖兒首輪出局，網友插爆有黑幕，克勤：「至於祖兒部份，我唔覺今晚有任何歌手係輸，因為上得《我是歌手》舞台證明有份量、見得人、優秀歌手，唔覺任何人輸，只不過一個比賽有人排第一，有人成績唔係咁好，自己好欣賞佢兩首歌演出，陳偉霆嗰個，嘩！跳得好好，《這麼近那麼遠》巡唱已覺佢唱得好，唔覺佢心情有影響。」

「我哋3個人嘅表現，自己係收貨嘅，好滿意第一首歌演出，希望所有香港觀眾欣賞我哋誠意，第二隻歌唱《愛是永恒》，因為學友係我師兄，今次樂隊有香港樂手，佢哋同我出生入死12集，呢隻好grand歌向佢哋致敬，每個樂手都有一個shot，對樂隊嘅尊重。」