馮盈盈過咗一年，終於卸下港姐冠軍頭銜，仲由一啲節目主持/美女嘉賓行列，跳出呢個舒適圈，開始拍劇。早排佢先拍完《溏心風暴3》，早幾日佢就為《果欄中的江湖大嫂》開工。

馮盈盈日前同楊明、黃嘉樂、江嘉敏一齊喺中環碼頭開工，場口就講述黃嘉樂同江嘉敏喺碼頭邊拍拖，馮盈盈同楊明唔使咁早到，一齊買完咖啡先嚟，仲遞咗一杯俾導演飲。

馮盈盈着住Wally style嘅紅白橫間衫，講養眼就唔及着短褲嘅江嘉敏嚟，不過佢趁未埋位就落力補妝，喺一班工作人員中間「印印印」，而楊明就坐埋一邊狂眯劇本背對白。

黃嘉樂同江嘉敏嘅拍拖戲拍完，終於到四個人一齊出鏡，楊明發現佢兩個拍拖好嬲，不甘男友受辱嘅江嘉敏就推咗楊明一下。每次停機，江嘉敏同馮盈盈都不停咁笑，氣氛好融洽。

話晒都係上年港姐冠軍，馮盈盈呢次拍攝吸引咗唔少途人圍觀影相，搞到一班工作人員要疏散人群又要提醒佢哋唔可以開閃光燈。至於四位演員開完工，都有自拍打卡放上IG。