【楚雲聲】對手曳得交關！「阿凡達」畀我開心過節（Cloudy）
蘋果日報 2019/12/25 20:40
阿凡達第五場Cloudy楚雲聲開心過節
阿凡達可望重新振作
年年聖誕後就忙於拆禮物，超過七成都係無謂嘢，因為開P（派對）慣咗係咁玩，最緊要enjoy（享受）。
今期比較摺，冇乜見人冇乜慶祝，嚟到boxing day（拆禮物日）嘅夜晚，始終想有啲禮物揸手，哈！
「A欄咁闊，掘啲草皮走啦喂！」當彩票換得番錢，就唔使靠人送，直接去買心頭好。
睇聽晚（26日）第五場四班1200米，嘩！實在太多莫講贏，連上名都成問題嘅弱旅，其實冇乜得揀。
贏完升班或加磅又好，跑極都只係識上名又好，當冇咁好形勢都難憧憬再有突破。
個人最鍾意「阿凡達」，晨課輕身湧住去，之前「阿茂整餅」轉配備跑1400米鬥燒梗係唔使理。
呢隻馬北上考閘好氣好力同好快，用番眼罩又有條欄，可以跑高好多，最緊要係評分夠低。
如果買Q要埋佢哋，「如真如假」上場快步速由頭頂到尾，贏完冇跌watt，繼續第四班好跑。
「超能量」連場搏失後都仲未見疲態，咁忠心唔飛得。
「超級炮彈」熱身兩場後積極煲熟啲，跟前好位，有望進步，呢幾隻應該夠力炸起個草皮畀我開心過節。