【新增動新聞】
英冠嘅布里斯托城禮拜三晚喺主場2:1絕殺曼聯，自1988/89球季之後再踢入英格蘭聯賽盃準決賽，球迷梗係開心到癲咗喇。球證一吹鷄完場，即刻有唔少球迷衝入球場慶祝。

根據報道，今場波有26,088名球迷入場，雖然唔知有幾多人衝咗入場，但咁都係可以理解嘅。喺1894年創會嘅布里斯托城，從來未贏過英國頂級聯賽冠軍，最接近嘅係1906/07球季拎亞軍。次級聯賽嘅冠（1905/06）、亞軍（1975/76）都試過，另外四次贏過第三級別聯賽冠軍，當中頭三次係南部嘅聯賽，後尾同北部聯賽合併，即係今日嘅英甲，最近一次贏冠軍就係2014/15球季。

本土盃賽方面，布里斯托城曾經喺1909年拎過英格蘭足總盃亞軍，另外三次踢入英聯盃4強，之前兩次分別係1970/71，同埋1988/89球季，今日有心有力衝落球場果批球迷，可能好多當年都未出世。

--------------------
狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM