中國第一位漫步太空嘅航天英雄翟志剛同代表團嚟香港訪問，表面上係同香港人一齊慶祝神舟七號飛行成功，背後就隱藏住一個難度更高嘅任務，就係挽救以煲呔曾為首嘅特區政府嘅民望！煲呔班子已經淪為一個政治大黑洞，太空英雄嚟香港走一轉，究竟可以幫到幾多？

唐唐煲呔輪流抽水

太空人翟志剛、劉伯明同景海鵬噚日上晝到埗，特區政府先安排政務司司長唐英年接機。唐唐兩日前先喺鏡頭前為遲派包機「一一一一」咁解畫，民望難免插水。深受萬人愛戴嘅太空人到訪，仲唔有咁實黐咁實？
夜晚就輪到煲呔抽水，會展晚宴款待神七代表團，包機同的士風波之後一句嘢都冇講過嘅煲呔，終於喺鏡頭前開金口，致辭完全唔介意行貨十足，話熱烈歡迎航天英雄訪港。煲呔成晚四萬咁口，傳媒有冇報道佢講乜並唔重要，重點係民望越跌越低之時可以同太空人一齊曝光。

苦練廣東話打招呼

威風凜凜，背負征服太空任務，加埋表情舉止帶啲卡通味嘅翟志剛，好多人都當咗佢係真人版巴斯光年。呢位「巴斯剛年」噚日施展渾身解數𠱁香港人開心，佢話到香港落機之後苦練咗三個廣東詞語，第一係「大家好」，第二係「香港」，第三個就唔記得咗，搞笑之餘表現直率；佢又祝港人好似佢坐火箭上太空咁，「飛得最高，走得最快」。
嚟緊神七英雄會到多間院校同學生對談，撇除「感謝國家、感謝領導」嘅傳統內容，佢哋只要感性啲講吓訓練苦況，或者對家人嘅感覺，港人聽吓聽吓就會收貨。但究竟太空人係咪可以幫到手，將煲呔民望由地底拉番上天呢？八方唔係好樂觀。淨係睇噚日電子傳媒處理太空人訪港嘅新聞，就略知一二。
先講有線新聞台，神七記者會噚日下晝3點舉行，八方㩒去想睇吓直播，點知有線揀咗機電工程署公開墮𨋢調查報告記者會嚟做直播，關心部爛鬼𨋢仲多過載人升空嘅神七。就算其他台晚間新聞，都放到中後段至播神七到訪。
不過只要有神七英雄嘅新聞，煲呔、唐唐就算冇直接得益，都可以歇幾日唔使做箭靶，因為未來兩日大家可能會暫時忘記包機風波、的士罷駛，同太空人一飛冲天！

mailto:[email protected]