老牌賽馬團體中，今戰有香港足球會嘅「旺金旺銀」，舊一派馬迷見香港足球會呢個名，會想起昔日嘅「上簽」、「上上簽」，新派馬迷或會諗到對上嗰匹「足球快綫」，之但係講到同足球有關嘅馬主，除咗羅傑承外，近期最hit就係貝鈞奇，佢旗下球隊愉園，有球員涉打假波，十幾人俾廉記請飲咖啡，對愉園主席兼足總副主席貝鈞奇嚟講，呢排肯定頭都大埋！
其實貝鈞奇養咗好耐馬，佢第一駒「奇泓小子」從未上過名，第二匹「奪魁」仲「勁」，來港出四次，咁啱都排位後退出，最後未跑過就退役。最新呢匹「天狼星」響三、四班幾乎次次跑包尾，但最近落五班，叫做有啲轉機，睇吓隻馬到時生唔生性，收番啲獎金，吓個主人開心。