當年今日
關於我們

【八方相當年】運房局政助符傳富 大學已經開補習社

蘋果日報 2017/12/04 06:05

運房局符傳富八方相當年

個個都想創業,唔通個個都可以創到業咩?運輸及房屋局局長政治助理符傳富(Mark)就做到喎,仲要喺大學時期已經創業。喺港大講精算嘅阿Mark喺大學二年級,已經同中學同學夾份搞補習社,喺旺角太子一帶租地方,小班教授學生數學,笑指「回本都算回得快」!
現屆政治助理中唔少高材生,阿Mark係其中一個,讀男拔嘅佢係05年會考嘅8A狀元,據知佢當年考十科,只有英文同聖經唔係A,而阿Mark唔係贏在起跑線。爸爸喺車房做,媽媽係主婦,一家五口住居屋,自稱係將軍澳「原居民」,「嗰時將軍澳好似啱啱開埠咁滯,出入都要搭巴士,小學出旺角返學要搭成個鐘頭車。」咁又係,阿Mark喺88年出世,當時將軍澳確實連地鐵都未有。
雖則會考有8A,但阿Mark話小學讀書唔係最標青,派位入到男拔後,亦唔算好勤力溫書,「真係未試過通宵咪書,都唔係太有效率」,覺得最重要係消化內容、融會貫通,「唔好死記爛記」。中四同中五呢啲搏殺時候,佢都繼續幫手搞學生會,到咗中六直情組閣參選,順利做咗主席。
由於成績好,拔尖到港大讀精算,「大學要做嘅五件事:讀書、上莊,住hall、兼職同拍拖,我都做齊。」原來佢升上大學後就同中學就相識嘅女友、即係現時嘅太太拍拖(兩人喺2014年結婚,家陣有個歲零愛情結晶品)。由於自細數學成績好,讀精算都唔意外,但原來阿Mark最鍾意嘅科目係歷史噃,「數學叻但其實唔係我興趣……中學我都唔睇小說,只睇歷史書。」
09年畢業後入咗畢馬威會計師事務所打工,至到2012年喺新界東立法會選舉為自由黨田北俊助選,之後入埋自由黨,踏足政壇,「嗰時覺得已經考晒專業資格,覺得想為香港做啲嘢。」2016年出任自由黨青年團主席,今年更走入政府「熱廚房」,佢話想趁年輕試下新嘢。至於個名經常被誤讀為「符『傅』富」,佢話細細個已經喺咁,習以為常咯!
empty
empty
阿Mark小時眼仔碌碌,佢話大咗隻眼反而細咗。受訪者提供照片
empty
受訪者提供相片
empty
返鄉下海南島時學大人打水井。 受訪者提供相片
empty
阿Mark小學六年級攞過常識問答比賽,證明佢由細到大關心時事。 受訪者提供相片
empty
上任政助後在立法會與議員林健鋒打招呼。
empty
2013年代表自由黨參加過京士柏區議會補選。 受訪者提供相片
empty
受訪者提供相片