【躁狂症】西乙瘋教練輸波 「愛心頭槌」 怒頂球員
西甲基達菲西乙附侯爾斯卡愛心頭槌
呢邊廂帕爾馬贏出意丙附加賽升班,西乙升班附加賽同樣進行得如火如荼,基達菲喺周六次回合主場3:0大勝侯爾斯卡,兩回合計贏5:2晉級決賽,將會同周日特內里費同卡迪斯嘅勝方爭取最後一個升班席位。輸波還輸波,其實侯爾斯卡已經創出57年隊史以來最佳成績,點解呢位教練要咁躁狂?
侯爾斯卡嘅59歲教練安基拿(Juan Antonio Anquela)喺球隊59分鐘落後0:1嗰陣,將中場大衛盧比斯換走,盧比斯離場後一直唸唸有詞,之後更怒踢水樽,又疑似向安基拿提出抗議,搞到後者無名火起,走上前喝罵之餘仲施展「愛心頭槌」頂向大衛盧比斯,最終要由職球員強行分開下先未有釀成更大衝突。西班牙傳媒就報道,呢位瘋狂教練唔係第一次做埋啲咁嘅嘢,試過喺操練期間趕走借將雲尼斯奧斯(Vinícius Araújo),仲批評球員唔夠盡力直接腰斬,唔知球員跟着呢啲瘋狂教練,心情係激昂無比抑或膽戰心驚呢?
↓侯爾斯卡教練怒頂球員↓
http://bit.ly/2rDYRov