有門票入鳥巢係身份象徵，港、台首富都要抽時間參加畀面派對，李超人噚日同寶哥哥夫婦同行入場，寶哥哥行「孖咇」，卻唔見超人知己周凱旋。台灣富豪郭台銘噚日同新婚妻子曾馨瑩甜蜜現身，郭台銘話會捧台北棒球隊場，希望可以奪金而回。

名人第二代都好熱衷睇奧運，賭王三太囡囡超雲日前已抵京，佢噚日話一家人都有飛入鳥巢，不過卻分開坐，佢知道父母坐一個包廂，佢則坐另一個，其他屋企人亦唔係一齊坐，不過佢話最緊要感受到現場氣氛，分開坐都冇乜所謂。超瓊、四太孖仔猷君、猷亨都有現身，幾人行色匆匆，相信係趕住入場。
范太唔角逐連任，可以輕鬆上京睇奧運，噚日便服一度出發去鳥巢，不過佢話由於趕時間，所以唔得閒接受記者訪問，遲啲有時間先慢慢傾。葉劉前晚單人匹馬去到北京，佢話今次只係睇開幕儀式，其他比賽無緣觀看，因為香港大把嘢做，唔可以久留京城，只可以返香港睇電視。
呢個全國盛事，香港運動界「第一家庭」霍家上下都忙到出煙，霍震寰負責招呼香港嘉賓，噚日喺各人下榻酒店團團轉，未停過。