金像電影《樹大招風》道具領班、「道具全」張偉全因管有22.3萬張拍戲時用的道具鈔票，涉案道具鈔票曾在電影《迷城》、《樹大招風》使用，早前被法庭判決他與首被告羅潤霖保管偽製紙幣罪罪名成立，判監4個月、緩刑2年。(新聞連結： https://bit.ly/2LcQvtc )

張偉全因不服判決提出上訴，案件今早10點喺金鐘高等法院審理，而香港電影11大屬會，包括香港電影導演會、香港電影編劇家協會、香港專業電影攝影師學會、香港電影美術學會、香港電影製作行政人員協會、香港演藝人協會、香港電影燈光協會、香港動作特技演員公會、香港電影剪輯協會、香港電影後期專業人員協會、香港電影副導演會，都有派代表到場支持，包括吳思遠、張同祖、田啟文（田雞）等電影工作者。

香港電影工作者總會永遠榮譽會長吳思遠，喺開庭前表示：「正當電影工業，利用規範、唔健全同灰色地帶告我哋，電影喺香港好難生存，呢個係我哋上訴理據。大家都唔知道要申請，違規都不至於犯罪，話道具銀紙形同偽鈔可以用，對我哋好唔公平，o依家仲有好多官司，因為拍攝電影而招惹，例如道具車。電影業同政府會全面檢討，睇下邊方面大家做到配合，令到電影業可以拍攝又唔會被規範。」

今日電影各屬會，均有派代表到場支持，對此吳思遠話：「我哋成行都支持，11個屬會都有嚟支持，因為感同身受，正正經經拍攝，點解俾人告定罪，大家咁覺得唔公平，拍攝電影等同犯罪，對電影業絕對唔公平，事件引起業界憤怒，同大家支持。我哋支持阿全上訴 ，為佢上訴籌款，有電影公司，有個人亦有匿名捐款，好多演員、導演分別支持，係可喜現象，成個業界覺得唔公平，希望今日上訴可以得直。」

精選娛聞，喺晒《娛果》
http://fb.com/appledailyent