【更新內容】滙豐銅獅Stephen及Stitt已完成首階段清潔，今日重新揭幕，而進一步的復修和保養工作將會繼續進行，並由滙控亞太區行政總裁王冬勝、滙豐 香港 區行政總裁施穎茵主持重新揭幕及祈福儀式「重光」。

儀式中王冬勝、施穎茵及滙豐御用風水師龍景銓齊齊佩戴透明 口罩 ，出席銅獅重光儀式。龍師傅手執羅庚及一支木筆，走上數級樓梯的台架上，到銅獅面前，先放下羅庚，再以木筆為銅獅周身點上紅色，包括點睛及為銅獅「搽腳甲油」，然後三人一齊面對傳媒合照，而王冬勝與「滙豐一姐」施穎茵亦有摸摸銅獅額頭讓傳媒拍照。

王冬勝及龍師傅穿上斯文西裝，值得留意的是，「滙豐一姐」上身穿上短袖絹質黑色上衣，以紅色為主的大絲巾，配搭紫紅色的絹質開叉長裙，襯上王冬勝、龍師傅之餘，亦不失大紅大紫的中式喜慶穿搭。

至於向着皇后大道中的一對本來完好無缺的花崗岩獅子頭，亦沒受冷待，龍師傅一一為它們點睛。

王冬勝表示，Stephen及Stitt坐鎮滙豐總行大廈已經85年，無論順境逆境，銅獅已成為香港歷史的一部份，但因 疫情 影響，海外專家未能來港，延誤復修工作，而整個計劃將會分階段進行。他指很多客戶、員工，以及市民大眾都很期待再次見到銅獅。因此決定首階段清潔後，率先讓他們重見天日。

施穎茵今早向內部員工發信，指雖然疫情對銀行影響依然持續，但仍然有些好消息值得宣佈，「經過第一階段對Stephen及Stitt的修復後，銅獅及石獅在祈福儀式後，將會再現公眾眼前。」又強調今次是獅子完全修復的第一階段，專家將會繼續研究。「如果你路過，可以歡迎下Stephen及Stitt返嚟。」

對於滙豐獅子今日重見天日，術數家蔣匡文表示，農曆9月是天罡月，天罡月是「麻麻地」，大可以早一點或遲一點，何必選擇這月份。日子方面，根據「建除十二神」，今日是「建日」，有重新開始的意味，但一般而言，擇日很少選擇「建日」，因為通常帶一點煞氣，「相信佢係用煞氣來撞日子，呢啲叫『鬥煞』，鬥煞即係，你惡，我比你更惡！希望可以頂住太歲。」不過，他認為：「如果按照我嘅擇日方法，就唔好意思啦，今日係比較凶險」，並指滙豐股價會非常波動。

至於堪輿大師龍景銓在石獅的眼、額、舌、爪點上硃砂是傳統開光儀式，蔣匡文解釋：「幫隻獅子開光，代表它有神明附體，有力量，以前唔好嘅嘢洗咗佢。」

滙豐獅子在「 建日」 重光，另一位堪輿學家麥玲玲估計滙豐未必有刻意挑選日子。「建日喺古時候係用嚟訓練動物，希望佢哋健健康康成長嘅一個日子。今日只係中吉，唔係大吉日，但又好彩唔算係四絕四離日，起碼冇撞正好差嘅日子，我睇滙豐今次冇好刻意擇日。」麥玲玲相信，滙豐獅子這對吉祥物在今天重見天日，進行了第一階段的修復，玄學上有逐漸向好的意思 。

麥玲玲指對滙豐有感情成份，不期望跑贏大市，但至少不要跑輸。「以前前輩教出嚟做嘢，出糧逐啲買滙豐，收息又OK。咁當然望佢好啦，第一步想滙豐派番息，小股東心情都會好好多。」

麥玲玲認為滙豐是一間代表 香港人 的銀行，與香港運勢一脈相承。當香港動蕩不安時，滙豐亦受到影響，因它有其象徵意義。她預測2021年整體向好發展，炒賣市場及銀行股，表現都會勝過今年。

堪輿大師龍景銓上世紀70年代已經開始為滙豐銀行擔任風水顧問，中環滙豐總行風水都由他佈局。2015年中環滙豐總行增添兩隻石獅子，亦由他負責計算風水擺位。龍師傅當時透露，英國人比中國人更加相信風水，而滙豐總行的位置處於太平山其中一條龍脈的穴位，屬於「倒騎龍」格局，風水相當好。對住皇后像廣場嗰邊屬於滙豐總行的後門，「以前未填海，前面冇嘢阻擋，叫做海光入煞，所以要擺兩隻銅獅子擋煞」。據資料顯示，曾蔭權任特首時，龍景銓亦曾為禮賓府睇風水。

滙豐在港立足155年，中環總行門前一對銅獅亦有85歲，張嘴咆哮的史提芬（Stephen）及閉口冷傲的施迪（Stitt），是獅子行象徵。

去年反送中運動期間，因星火同盟在滙豐戶口資金被凍結，引發銅獅今年元旦日遊行成為出氣對象，遭示威者淋漆兼火燒，最終要「木箱藏獅」圍起，「信邪」一族將銅獅歷劫與滙豐命運連結解讀。「紅燒獅子」 滙控史無前例因武肺疫情宣佈暫停派息，及後又因「港版國安法」夾在中美之間，被梁振英及官媒連環追擊，滙豐亞太區行政總裁王冬勝於街站簽名撐「港版國安法」亦無助扭轉劣勢，令滙控股價從年初由60元水平跌至最低27.5元，海嘯供股價28元也不保，現在股價處於30元水平爭持，今早微升0.5%，報31.2元。

-----------------------------

掌握理財智慧 感受生活品味

investMAN 全新網頁 優雅登場

-----------------------------

【全球樓行】 Dream House零距離

屬於香 港人 的移民攻略

-----------------------------

上車必讀天書 「九成按」入市懶人包

點擊即睇 《按揭必讀手冊》 電子書

----------------------------

支持蘋果深度報道，深入社區，踢爆權貴，即Like 蘋果專題及調查組FB專頁 ！