北韓領導人金正恩被爆鍾意由美帝掌管嘅曼聯，都真係震驚過佢又核試；世界不同政治人物，又鍾意邊隊呢？英國視英式足球為國技，威廉王子、前首相卡梅倫都鍾意阿士東維拉，前香港特首董建華因為留學利物浦關係，所以係紅軍粉絲，不過估唔到，已故嘅恐怖組織頭子拉登，亦鍾意英國波，捧阿仙奴場。德國總理默克爾就撐自己人，每逢德國國家隊有大賽，佢都會捧場，香港前財爺曾俊華之前都有入場支持香港隊比賽。

咁成日講中國足球夢嘅習近平主席呢？「習大大」都可以話係強隊球迷，之前到過德國、英國出訪，就去過當地球會拜仁慕尼黑及曼城參觀，又同阿古路等球星合照，不過國內傳媒心水清，話習大大最早期應該鍾意阿根廷，早在1988年仲做緊福建省寧德市委書記時，已經引用阿根廷拎世界盃做例子，除咗有球王馬勒當拿，仲要團隊互相支持，先至可以成為冠軍，嚟分析國內經濟，所以有理由相信，習大大對阿根廷有一定情意結。