財金冒險號:以轉會費喻樓價 - 笑笑生

蘋果日報 2017/07/28 00:00


樓價高,唔止係香港問題,仲係全球大都市嘅問題。佛利民話齋:通脹何時何地都係貨幣現象。其實樓價一樣,都係2008年金融海嘯後全球濫印銀紙嘅現象。QE亦波及足球轉會市場,只要你睇睇十年來轉會費走勢,就會對樓價飆升釋然。
2009年C朗拿度由曼聯去皇馬,轉會費係破紀錄嘅8,000萬英鎊。8年後嘅今日,愛華頓盧卡古之流都要7,500萬英鎊,𠵱家盛傳尼馬由巴塞轉會PSG,更加要2.2億鎊。放諸樓市,等於2009年買半山豪宅嘅錢,今日只夠買美孚新村,𠵱家想買半山豪宅就要畀貴兩倍。

曼聯領隊摩連奴最近都話:轉會費高到危險地步:「普巴、尼馬之類頂級球星,超高身價冇問題,因為一年只得一兩宗。問題在於其餘嗰百幾宗……大球會大把錢,喪買球星都唔怕……至於一般球會,一係唔甘心咁貴買啲普通球員,一係就要高價同人搶。𠵱家閒閒哋一宗交易都要三、五千萬,令人擔心。」
摩佬呢段說話,完全可以套用喺香港樓市:山頂、干德道、壽臣山之類真正豪宅,幾貴都冇問題,因為稀有,而買家係真正富豪,唔怕樓價跌。問題在於一般市民,一係驚摸頂,唯有繼續租樓,一係夾硬高價衝入市。𠵱家新界上車盤都閒閒地600、700萬,偽豪宅分分鐘過千萬,確係令人擔心。

笑笑生
http://fb.com/sneeringman
本欄逢周五刊出