【李八方online】21人獲任監票人 邊啲新寵獲欽點?
李八方人大選舉監票人
有21人獲欽點為監票人,包括唔少親中政團新寵。圖為測量師林力山。許頌明攝
近千八名出席人大選舉會議嘅成員,今日除咗要以全票制選出36位新一屆人大,開波之時仲要以舉手方式,選出主席團推薦嘅袁武擔任總監票人及21位監票人。查實監票人有啲乜嘢任務?有監票人話除咗喺投票期間幫手,其後CHECK住選票無損毀,簽名封箱後就完成任務。
查實佢哋做啲乜未必重要,反而邊啲人獲「欽點」肩負重任更可圈可點!八方發現當中有唔少民建聯區議員如陳學鋒、李世榮、盧懿杏,亦有新民黨陳家珮同工聯會鄧家彪,咁啱兩位都擬代建制派出戰港島同新東補選,但或於九西出選嘅民建聯鄭泳舜就未獲題名。據聞獲「欽點」者喺西環圈獲高度信任,同黨派無關。
近年開始活躍於親中政團嘅觀瀾湖集團主席兼行政總裁朱鼎健,以及兩位建制派專業界別組織新寵,IT界女將李煥明同測量師林力山等亦上榜;日後有乜作為,備受注目!