當年今日

深圳68萬做老本行 酒店頂樓開紅酒吧

蘋果日報 2002/08/13 00:00


每逢星期六、日或公眾假期有不少港人到深圳吃喝玩樂一番,所以當地的夜間娛樂場所都非常熱鬧,因而亦吸引不少創業人士欲分一杯羹,就像從事娛樂事業多年的Donna,因得到紅酒商的支持,與內地朋友合資開設深圳市內少有的專賣紅酒酒廊!

記者:劉耀 攝影:CarlZeiss
招牌菜
北上先鋒
80年代 國內搞製作
Donna早於70年代已在香港經營酒吧生意,原來還是北上創業的先頭部隊之一。「80年代我移民澳洲,但之後常心思思返港搞生意;89年終於在內地成立製作室,專門負責內地的表演製作及宣傳等工作。」就在內地搞表演賺得盤滿缽滿的時候,Donna卻突然結束所有國內業務返港。「因為我已經開始覺得厭倦,有種想停嘅感覺,所以喺93年就結束所有事業返港,畀自己好好休息。」

紅酒廠支持 憑經驗再創業
不過,搞娛樂事業始終是Donna的興趣所在,休息兩年後,她再繼續其創業之旅。「95年我喺跑馬地及九龍塘開過餐廳及卡拉OK,但發現顧客的消費意欲已大不如前,生意比以前難做得多,做咗幾年蝕咗唔少錢之後就結束。」既然香港搵食艱難,Donna就再萌起返內地創業的念頭。
「始終開LiveBand酒廊係自己嘅強項,而且又有內地『新天』紅酒廠支持,可以提供優質紅酒,加上深圳現時未有專做紅酒的酒廊餐廳,所以靈機一觸就將酒廊結合餐廳,再以紅酒為主打,開設『新天紅酒坊』。」
主題酒廊
選址頂樓 無敵遠景
酒吧的位置並非一般街舖或商場內,而是開設在較冷門的酒店頂樓,坐擁無敵遠景,不過這類舖位可遇不可求。「搵舖位通常都係靠睇報紙,無論街舖或商場我都有睇過,由於我哋主要做消費能力較高的一群,所以店址要求比較高,除本身舖位合適外,更要顧及附近環境,可惜睇來睇去都唔啱心水。最後靠朋友幫手,花上七、八個月時間至搵到深南東路長安酒店頂樓舖位,而上手亦係做開餐廳生意,我用咗28萬頂手費頂咗落嚟。除咗有酒店住客外,附近亦有多間大型食肆,咁一班人食完飯就可以上嚟飲番杯。」

換音響建舞台 裝修兩星期
由於是走高檔路線,所以對店舖裝修,Donna亦一絲不苟。「雖然舖位前身亦是開餐廳,但和有LiveBand的格局就大大不同,所以音響設備便要全部換過,重新安裝符合LiveBand演出的音響,還要加建舞台,等客人可以從座位直接睇到台上的表演;原本靠窗的座位亦全部改為梳化卡位,令客人坐得更加舒適。由於深圳現時的裝修材料已經非常齊備,無論甚麼材料都可以買得到,所以很快就可以搞掂起貨,整個裝修過程只花了十多日便完成。」
朋友多捧場 日有萬元營業額
這裏雖然開業至今只有兩個多星期,知名度仍有待建立,但Donna對現時生意額亦相當滿意。「由於自己同拍檔都多朋友,所以唔少朋友都會上嚟捧吓場,幫襯之餘亦提出不少意見,讓我們改善。而且可能係酒店關係,所以顧客都以香港人居多,因而對紅酒生意亦有一定幫助,試過一日最多的生意額有萬多元,對新店來說,已相當不錯。

內地廚師 水準不斷提升
「廚師方面則在當地招聘,深圳其實都有好多西廚,不過水準就接近茶餐廳風格,平時大家亦會互相研究新菜式或烹調方法,但就要花時間慢慢教,而且內地人做事始終唔及香港人靈活,話頭醒尾,有時就要靠經驗搭夠。」

紅酒兩大類 入貨比港平
既然打正旗號做紅酒坊,紅酒質素當然要有番咁上下,主要分兩大類:「若是內地紅酒就採用『新天』紅酒,全由新疆生產,價錢比外國入口的紅酒平;而外國入口的紅酒就經內地酒商進口,價錢比香港售價平約20%。除了品嘗紅酒之餘亦有新鮮牛扒配合,讓更多客人認識如何品嘗紅酒。」
未來大計
盼開連鎖店
開食肆最希望就是開分店,令知名度可以提高,Donna亦不例外。「我最希望就係將紅酒坊做到好似連鎖店咁,同國內其他酒廠合作,令更多人可以認識紅酒坊。」
Donna開業心得
1.有主題: 最緊要畀人知道Sell乜,主題突出易記得
2.要老實: 做生意最緊要老實,唔好以為內地人好呃,分分鐘呃番你轉頭都唔知
3.勿信人: 內地騙局五花八門,切勿輕易信人
4.多比較: 入貨價錢差別大,走多幾間冇蝕底
新天紅酒坊 開業本錢
開業日期:2002年7月18日
租金(約3,500呎,
兩個月上期) ?66,000
頂手費 ?280,000
裝修 ?120,000
人工(約20人) ?55,000
入貨 ?60,000
雜項 ?6,000
流動資金 ?100,000
總數 ?687,000
預計首月營業額:?150,000
預計首月盈利:?3,000

所需牌照
1. 西餐牌(必須內地人持牌)
2. 酒類經營許可證
3. 衞生許可證
深圳市工商局行政管理局
網址:www.szaic.gov.cn/
聯絡我們
面對香港經濟不景,裁員不停,失業率持續上升,香港經濟逐步轉型,人人北望。「北上創業」版訪問一些香港人在內地成功創業的例子,如閣下是其中一分子,又願意將你的經驗跟讀者分享,請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真:27420542。請附聯絡電話。