喺金融圈中，識講股又識講風水命理嘅，除咗人人都叫佢做沈大師嘅沈振盈，仲有一個都係姓沈，佢就係高信集團控股（007）行政總裁沈慶洪。沈慶洪有玩開風水命理同八字，行內好多人都知，但佢嘅興趣唔止咁少，賽馬同氣象分析都係佢杯茶，佢話，最鍾意用腦，所以由工作到興趣，都係要個腦轉不停。
其實沈慶洪對邏輯性強、思考度高嘅嘢都好有興趣，所以唔止玄學，早年仲好鍾意研究賽馬，佢話賽馬有啲似統計，匹馬擅長跑幾長賽程，擅跑乜嘢場地，有資料就有程式計。

佢仲話通常頭一兩場唔落注齋睇，留意贏咗嘅馬匹嚟自邊個大馬房，或者由邊個騎師策騎，贏開有條路，之後嗰個大馬房或騎師嘅馬，好有機會再贏咁話，信不信由你喇。不過佢話𠵱家捉路較難，影響嘅因素多咗，所以少玩咗馬，反而玩多咗氣象。
氣象又啱？咪又係一大堆數據，有程式可以分析嘅嘢，加上讀書時成日望掛8號風球唔使返學，所以沈慶洪睇書自學，佢仲不時上天文台個網站睇氣象圖，自己分析雨量、雷達圖等，預測吓當日天氣，試過明明出門天朗氣清，但佢都帶定把遮，就係因為睇過氣象圖，知道雲雨帶會喺下晝經過，好大機會落雨。
佢笑笑口話：「都會研究吓個8號風球打唔打得成，大約幾時會掛，可以準備提早收工吖嘛。」