韓國男團Highlight五位成員尹斗俊、龍俊亨、梁耀燮、李起光和東雲，近日再度襲港，噚晚於九展舉行「HIGHLIGHT SHOW IN HONG KONG」，又唱歌又玩遊戲近兩個半小時，騷上成員及粉絲驚喜預祝東雲嘅27歲生日，令東雲非常感動。

Highlight噚晚表演《Calling You》、《Celebrate》、《Ribbon》等歌曲炒熱氣氛。另外成員於台上玩踩單車鬥慢、頂波、整熄蠟燭等遊戲，展現鬼馬一面。

Highlight亦向粉絲分享近況及工作計劃，梁耀燮近排忙於主持電台節目，之後亦會推出solo碟。東雲亦即將主持網上的電台節目，起光就透露有可能接拍新劇。

另外，龍俊亨透露前日飛抵香港即食咗點心，大讚好好味，東雲就買咗曲奇。另外，東雲將於6日迎來27歲生日，成員及粉絲唱生日歌預祝，之後又影大合照留念。隨後東雲搞笑地問有冇蛋糕，不過之後講返其實喺後台有收到大家嘅蛋糕及禮物。東雲突然咳咗幾聲，佢立即講：「唔係感冒，唔會喊，唔會病。」又話：「大家嘅幸福等於我哋嘅幸福。」並再一次感謝大家。

Highlight於安歌時演唱《Can You Feel It?》及人氣歌《Beautiful Night》，圓滿結束是次港騷。

更多韓流，喺晒《娛果》
http://fb.com/appledailyent