有關泛民四席輸兩席，我第一時間，係忍手唔出文，趁我人在英國有八小時的時差優勢，可以瞓一覺等頭腦冷靜啲再寫。

首先，一如以往，本土派第一時間被拿出來祭旗，左一句無盡力、右一句唔幫手拉票，講到本土派見泛民hihi就最開心咁。但我想講嘅係，其實唔關本土派事，如果本土派唔幫你含，你新界東哪裡來的兩萬票大勝？說穿了，本土派班細路就係一班有被虐待傾向的矯情小賤人，佢地口講焦土、話想做港豬，但面對大是大非，始終良心過不去，一邊唱歌容祖兒的「喜歡你待我薄情、喜歡你為人冷酷」，一邊為你含淚。只要佢地一日仲有睇報紙、一日仲繼續關心香港，呢班幻想自己可以笑傲江湖的深本土「任我含」，會是會繼續精神焦土，但默默為你投票。

有人的地方就有江湖，燕赤霞跑到蘭若寺也逃不了，更何況你還身在香港？

而最正嘅係，當泛民輸了，第一時間又繼續鞭打本土派，而本土派又繼續口口聲聲大叫焦土。起初我有想過為深本土派的朋友說句委屈，但家家有本難念的經，似乎這種家暴老公與嘴硬妻子的戲碼，大家也樂在其中，我作為非本土派的死八婆，就別管人家好了。

你真正流失的，是淺本土派和對你的家暴看不過眼的中間游離選民，類似美國大選「搖擺賓州」嗰班（笑）。

我之前寫文有講過，初選後會出現口和心不和的狀況，完美反映在姚生的成績表上，民協的票倉流失巨大，哪怕民協嚥得下這口氣，叫大家投票，各民協粉絲又哪裡坐得住？結果齊齊望吓哥基，又望吓個大屁股：Go kiss my ass 啦！

話不可以說盡、勢不可以去盡，凡事太盡，緣份勢必早盡。尤其是明知對方在初選後要合作，就唔好打得咁大力啦，不過泛民就係咁，只要唔同路，就會出盡力打、往死裡打，打完又會期望對方支持。但很抱歉，民協班選民可不同本土派班細路，佢地真係可以衝冠一怒去食飯，然後一票不投，佢地做得出㗎。

其實唔好賴人，乖，大個仔㗎啦。

指責別人前，先想想自己的推廣做成點，街站輸人輸陣、旗海及各式推廣出得又少又遲，泛民加DQ係有光環，但有光環唔係大晒，你空降已經打咗折扣，再望吓自己啲banner出成點樣？

睇新聞話姚生係睇重網上選情，所以below-the-line推廣放軟手腳，我想講嘅係：咁你呢鋪真係抵打手板。

你望吓自己個選舉專頁？個個post一百幾十個留言，你回咗幾多個？街站嫌老套兼浪費資源唔擺都算了，但網上留言，等同街站有選民同你傾偈，你的處理方法竟然係直接無視？！家陣啲選民欠咗你㗎？哪怕我不求於讀者，我一日起碼回一個鐘留言，無錯，係一個鐘，食緊飯回，去緊廁所回、等升降機時回。你有求於選民，竟然已讀不回？你唔回，佢地下次就唔會再留言㗎啦，然後咪愈嚟愈唔engaged囉，說好的溝通呢？

好，我地唔講佢同團隊管理個專頁如何強差人意，我再講網上宣傳，識玩其實可以用專頁直接踩去其他KOL、新聞專頁留言，零成本之餘，仲可以接觸大量選民，留個言幾簡單，但有冇做？冇。至於有冇私底下搵其他KOL叫大家幫手出post、美言幾句？冇。有冇管好自己班粉絲，唔好同圍_票找架打？冇。有冇考慮過自己的網上公關？冇。

咁你同我講主力做網上宣傳？同我做marketing 時，啲西客開完個Facebook 之後走嚟問點解無生意有咩分別？咁簡單點解唔做？一係懶一係蠢，一係坐定粒六，諗住自己瞓喺度都贏。

結果，咪瞓喺度囉。

健吾姐姐成日話政客唔可以當自己係KOL，我覺得當KOL咁玩都唔係大問題。問題嘅重點係，你連點做KOL都唔知，我真係唔知點幫你好。

專欄作者簡介：
倫敦人妻先生
既是人妻，也是先生；我八婆所以我存在。

Facebook link：
https://www.facebook.com/mrwifelondon/