一拖(038)本業靚仔唔在講,揸住交行(3328),帶嚟5倍回報,一拖肥仔水。一拖07年半年度(6月底止)純利狂飆咗近3倍到1.2億銀(人仔.下同),主打農業機械業,溢利繼續穩步上升,新加入嘅柴油發動機及燃油噴射器項目,亦已經為一拖帶嚟上4900萬銀溢利,成為第二大業務貢獻板塊。一拖既係扶農國策股,集團又有龍頭優勢,農業機械業已經坐定粒六。加埋喺業務壯大下,若果獲注入柴油機呢類搵真銀業務,未來業績仲爆炸。
又一拖家陣揸咗交行800萬股,成本價1.96元,交行呢期一支箭升到上12.88元,為一拖帶嚟近9000萬銀利潤。投資成績一樣靚仔,一拖業績錦上添花。好保守計數,一拖07年度純利2.4億銀,PE都係15倍,國企股狂牛,一拖呢個PE水位夠晒吸引。以一拖20倍PE做目標,要升30%到6.16元。