現年56歲嘅林偉健，當年加入TVB，除咗有唔少演出機會之外，仲係台慶御用表演主力。其實佢讀書年代，因為入選咗香港體操代表隊，成風頭躉之外，仲係學校嘅校草，佢話：「嗰時中學讀美孚地利亞中學，F.4、F5時已經係校草。學校體育館係平台，我練習時，出面好多女同學喺度睇。」

據林偉健講，由於校刊期期有佢嘅報導，因此儲落唔少女fans。佢話：「校花都偷偷寫過情信畀我，嗰時好純情，冇拍拖。早晚要練習，下晝就返學，見教練同隊友多過見爸爸、媽媽。」

除咗校花，好多女同學都慕名寫咗唔少情信表示傾慕：「女同學仔會將啲信放體育部交畀教練，由教練交畀我。內容咪『你好叻仔』，『好型仔』咁囉。同埋每次完成高難度動作，例牌班女生就會尖叫。」Fans嘅熱情歡呼，偉健話都會當聽唔到，因為要好專心，唔係好易有意外。真正拍拖就要等到佢入TVB嘅時候，相信當時對象就係黃曼凝(即劉德華版《神雕俠侶》中演郭襄嗰個)。

林偉健透露30幾歲時，曾經同一位圈外女仔結婚，囝囝今年都已經廿幾歲，不過好多年前已經分開回復單身。偉健話囝囝比較文質彬彬，喺北京讀緊大學主修醫科，佢話：「覺得內地發展較大，所以安排囝囝喺北京讀書，好似我哋返內地拍戲，都要識佢哋文化。」