明年香港嘅演唱會好熱鬧，除咗有美國天后麥當娜駕臨亞洲博覽館演出外，紅館同樣有多位港、台巨星排隊開騷，其中最矚目最令歌迷尖叫吶喊，首推台灣天團五月天嘅5月演唱會，今年五月天因訂唔到紅館檔期，令每年喺香港嘅「五月之約」斷纜，全港「信徒」大失所望。

當時五月天喺社交網許下承諾：「今年因場地因素未能如願，但累積更多思念與等待，相聚一定更多歡笑與感動。與大家共同期待，第十次『五月之約』在2016的紅館。」講得出做得到嘅五月天，終成功攞到明年5月紅館檔期，與粉絲再續前緣。

負責香港主辦嘅特高娛樂發言人，今日向本報證實，五月天將於明年5月再踏紅館開騷，暫定開8-10場，打破去年7場的紀錄，年年唱年年爆嘅五月天，去年紅館騷更掀南亞裔和菲籍排隊黨聯軍，貴飛$980喪炒到$6869，停咗一年冇得睇五月天嘅「信徒」，相信明年演唱會門票公開發售時，勢必再掀炒飛熱。而台灣幫除咗有五月天之外，天后蔡依林同張惠妹都排定明年1月輪住唱上紅館，ALin則於3月開騷。

至於本地薑歌手陣容亦唔輸蝕，據知，溫拿樂隊申請到明年2月嘅農曆年檔期，再一次同觀眾喺紅館過年逗利是，今年2月阿倫才喺紅館完成13場「銀河歲月40載演唱會2015」，事隔一年又孖溫拿踩紅館場，袋袋平安認真和味。

天后方面，林憶蓮將於明年3月舉行個唱，已有三幾年冇喺紅館開騷嘅憶蓮，令觀眾引頸以待；殿堂級歌手有林子祥於明年1月舉行入行40年演唱會，肥媽就喺明年3月舉行入行30周年演唱會，上次肥媽開紅館騷時發現子宮生瘤，現完全康復嘅佢，再上紅館值得慶祝；

偶像級則有林峯喺明年4月開騷，今次係佢喺紅館嘅第5個演唱會；另國際著名鋼琴家郎朗就於1月尾舉行鋼琴演奏會，首開四面台跟80人管弦樂團合作，相信令觀眾聽出耳油。