唔少有心人未必願意踏上從政路，偏偏工聯會立法會議員麥美娟（Alice）22歲仲卜卜脆時就「入行」，1993年獲委任為葵青區議員，係當時最年輕區議員（自此卻走上盛女之路……）。如果Alice少女時代冇參加作文比賽，相信都唔會同政治結下不解緣。

為亡母放棄留加

5歲嘅Alice憶述中六時就讀中華傳道會安柱中學，參加全港英文作文比賽兼勝出，本來獲獎學金到加拿大進修，點知媽媽嗰年過身，惟有放棄到加國升學機會。佢嘅老師都覺得可惜，鼓勵佢參加葵青區青少年徵文比賽，估唔到佢中英文一樣掂，再次WIN，呢次有機會去新加坡做青年大使，由於時間短，所以成行，嗰次係佢首次離開家門去外國，亦因呢個旅程令佢返港後參與青年組織，開展地區服務。
作文咁叻，少女時代係咪發夢王？佢話錯晒，皆因嗰時得獎嘅係議論文，中文嗰篇係講葵青區發展，原來佢被爸爸自細訓練每日睇報紙，「我仲記得嗰時睇《快報》」。但Alice從冇諗過做作家，讀書時志願係做律師，但最終卻考入中大英文系，成為工聯會「英（文）女皇」都唔錯吖。