高登天后瓊姐月中無啦啦俾高登admin「Bam」咗，雖然「復活」番，但佢就意興闌珊，話要退隱，仲誓神劈願話決不返高登。不過，話就話退隱，實質係不知幾active，喺自己個facebook專頁成日有post，先頭仲話 「大家呢排點呀？好掛住我dfans喲！」 、 「哎喲喲見到娛樂台咁冷清就想笑」 等等，分明就係牙癢癢！

係嘅，冇咗KingJer，班高登仔少咗個圍攻目標，又真係幾悶嘅。何況，大家都好想知瓊姐點解無啦啦由撐祖兒變成鬧祖兒撐千嬅囉。

而瓊姐亦躍躍欲試、為出山作最後準備，就今日之嘛，即時新聞一報道佢同祖兒單嘢，瓊姐就即刻post上facebook，話 「又報我做乜？我退隱江湖架喇！」

咁高登仔當然唔放過呢個機會，話 「好掛住瓊姐」 、又拉祖兒(容祖兒)落水： 「祖兒終於識瓊姐！」 (之前祖兒係話過唔知瓊姐係乜水)。不過都有高登仔引述番祖兒被問到遭瓊姐「背叛」時，感覺如何，祖兒就話： 「唔支持又冇簽死約。」 高登仔拆解之後，覺得言下之意係 「瓊姐命仔凍過水」 喎。

高登巴打講到咁興高彩烈，把口話明唔會重返高登嘅瓊姐，點忍得住？梗係想留言回應啦，但面子要緊，要搵番個下台階。所以一個鐘之前，佢就喺facebook度有新po，話: 「如果呢個post夠500個like我就出山啦♥」 。呢個po一出，頭15分鐘，已有115個likes。截至凌晨12點，有252個like。500個，話咁易啦...

而且都有網民話瓊姐係呃like，又話 「出山收山都唔關我事，唔好再同joey扯上關係就得」 ，又係嘅，大家上網都見過呢類post，話「如果呢個post夠xxx個like，就xxx」，但人哋通常都set喺1,000個like、甚至10,000個like「女朋友就肯嫁俾我」。0依家瓊姐只得500個，要求咁低0架！