舊年中至分拆上市嘅新世界百貨（825），08年年報新鮮出爐，大家都知彤叔鄭裕彤旗下呢間公司，實情交咗畀第三代鄭志剛（Adrian）擔大旗，年報都話佢係「負責監督本集團的企業事務」。

純官掛名　攞得仲多

所以董事薪酬方面，彤叔連名都冇掛（即係冇做董事），純官做非執董但都冇𢭃人工，只係袋10萬袍金，另加「以股份為基礎支付的」79.2萬銀。咁Adrian作為執董兼薪酬委員會成員，會唔會益吓自己呢？點知呢個後生仔好捱得，同老竇一樣冇𢭃人工同花紅，只係攞15萬銀董事袍金，另加「以股份為基礎支付的」39.6萬銀，仲少過純官。真係阿仔搵錢老竇享福。
咁Adrian又的確交到功課，上個月《福布斯》公佈「200家最佳亞洲企業榜」，新世界百貨就上咗榜。而新世界發展（017）尖沙嘴樓盤入面嘅商場項目亦由Adrian負責，佢諗頭多多兼親力親為，仲親自飛去意大利搵租客㖭，只係家陣市道唔好，齣重頭戲會唔會如期推出就好難講囉。