一連9場《李克勤慶祝成立30週年演唱會》今晚紅館開鑼，門票開售之前大家對住張絕望座位表都好絕望，擔心買唔到飛。開四面台、1萬4千個座位，但得兩成飛，克勤都覺得好好無奈，因為內部好多人買，佢仲推介大家買$480門票，笑言：「$480都幾好睇，睇我唔使坐咁前。」更順應民意加場添！

今晚前來的，有阮兆祥同女友、趙世曾與女伴、狄波拉、蔡志明夫婦、任達華、楊受成夫婦，鍾舒漫、克勤父母、太太盧淑儀及其父母家人、許靖韻、陳凱彤，洪杰等等，仲有英皇娛樂集團行政總裁許佩斯，英皇娛樂總經理麥錦釗，不過克勤兩個囝就未現身。

2032：正式開場

2035：克勤着住全黑踢死兔出場，並喺12位舞蹈員陪同下，唱出《舊歡如夢》，但有別於以往嘅向左右un，只係以手腳郁動嚟代替。

2038：唱第2首歌《In The City》時，舞台大玩變形。台中升高，及升上大鐵架，克勤吊住威也，向台兩邊做出向前傾斜離地45度高，之後再跳高，旋轉約10圈，台周邊再爆煙花，場面壯麗。

2043：去到第3首歌，克勤以《紅日》及《夏日之神話》等經典hit歌組成medley，現場氣氛熱烈，另外再加多6位着紅裙嘅女舞蹈員上台伴舞。

2054：喺唱完一連串medley後，克勤跳到身水身汗，話自己似跌咗落泳池咁，不過佢問啲觀眾自己跳成點，現場一度出現dead air，克勤醒目即話：「我知大家係為咗聽歌入嚟嘅，頭先嗰啲係甜品，不過我覺得唔同年齡、唔同階段嘅歌手都有唔同嘅進步空間。」佢又話雖然今次係30周年演唱會，聽起上嚟好似好巴閉咁，但係佢話自己日前做過入行50周年嘅汪明荃演唱會嘉賓，先覺得入行30年其實都唔係多，佢仲以入圍《全美一叮》小巨肺Celine打個譬喻：「如果佢早入行的話，30周年都只係30幾歲。」佢再透露，自己個台比預定遲咗搭好，係今日下晝2點先搭起，所以請觀眾包涵啲唔完善嘅地方。

2103：唱完《當找到你》之後，克勤攞住支藍色結他，自彈自唱《告別校園時》，佢仲笑言自己好似菲傭咁「融入家中」，佢再解釋話係融入隊band。

2113：克勤唱到《活著為求甚麼》時，企喺只容納到一個人咁闊嘅舞台仔，升高至20呎，大晒佢件超長舞衣。相信係為安全，所以佢腰以下固定住，只有上半身可以隨意郁動。

2118：克勤換上綠色西裝褸同藍色西褲，襯眼鏡以斯文look現身，唱出《天水圍城》。

2123：克勤企喺一個以技搭建成嘅佈景下唱出《二十四城記》。

2133：喺間場時，大會播放克勤好友預錄的短片，當中包括譚詠麟、劉德華、郭富城、稱呼克勤做「克勤叔叔」嘅謝霆鋒等，片中蔡卓妍（阿Sa）話自己細細個已經聽克勤啲歌，仲記得二年級時放學返家，第一件事要撳收音機聽《一千零一夜》。另片中又請啲嘉賓爆克勤缺點，阿倫話：「克勤同叻一樣，係『過份嚴重尊重老婆協會』，不過阿叻再嚴重啲。」周慧敏則爆克勤認人好差，鄭秀文就話克勤太瘦，50歲人keep仲得咁fit。至於黃偉文（Wyman）就攞住張寫住「溫戚勤」嘅紙現身，話當年揀天王冇揀中克勤，係啲人run chicken（走雞）。

2138：首晚嘉賓鄭秀文（Sammi）出場。

2146：Sammi全藍裝同全紅裝嘅克勤好襯，克勤送咗紅色玫瑰俾對方，Sammi就話克勤似利是封，仲話克勤好麻煩，叫人做嘉賓仲要指定着咩顏色嘅衫。

2153：Sammi話自己原打算着黃色，成條蕉咁上台，但0依家變咗波子汽水咁，克勤就話fashion嘅嘢由太太同Wyman決定。大會又播出兩人拍《浪族闊少爺》啲劇照，其間Sammi提到喺娛樂圈中，最珍貴嘅係得到友誼，好似自己之前開騷失聲，克勤有send message主動提幫手，到今日克勤喺冇綵排下直接開騷，Sammi又鼓勵番克勤。

2156：克勤唱出周慧敏嘅《最愛》，佢話首歌嘅詞係自己寫，仲話其實自己過去填過好多詞，但大家未必知。此時克勤講嘢時現聲沙，但唱歌就回復正常。

2234:克勤唱完第二part medley，深情話番呢幾年經歷，佢話由2011年起，為咗家人慢慢向後踏後一步，一踏再踏，到o依家都冇後悔，因為享受到好多家庭樂，仲選擇離開合作咗30年嘅團隊。

2239:克勤向來都係足球發燒友，鳴謝樂手時都用咗個特別方法介紹大家，就係要每位樂手穿上球衣出場，係大電視上播放。介紹完畢，旁白就話﹕「大家請以熱烈嘅掌聲，請最有實力嘅足金金猴出場。」

2250：克勤獻唱《護花使者》時以踢足球動作同dancer一齊載歌載舞。期間克勤由一個小升降台彈番上嚟，由於地下好多紙碎，克勤差少少跣腳，好彩有驚無險。克勤話呢一part佢只係排咗兩次，自覺「算係咁」，佢話﹕「我將足球融入舞蹈中，足球喺我目心中好重要，30年足球代表咗我好多嘢，仲有一個花名，其實我都唔知點解，但冇所謂，娛樂觀眾啦。」呢個花名唔係咪講緊「送禮勤」呢？

2311：克勤encore到子時(11點)，即農曆七月十四鬼門關開，克勤都有搞吓爛gag話：「真係好似冇乜人走喎，但台下有四個吉位，係咪真係走咗，定我見唔到呀？你哋都知呢幾日㗎啦....。」

2330：頭場演場會結束