代表得建制派參選，到底會有啲乜嘢先天優勢？除咗會有支大水喉射住，將個嘜頭射到上「高牆」，等全世界知道佢「即將」去馬嘞，同時亦有大批權貴「歸隊」做啦啦隊，陪落區達群星拱照效果之餘，更會喺網上出動助谷人氣。

話說喎，近日陸續有市級政協委員收到手機短訊，內附傳代表建制九西披甲嘅前食衛局政助陳凱欣近期先開嘅個人Facebook專頁連結 https://m.facebook.com/yanchanhoiyan/ 。咁佢嗰區冇乜蚊患，人又活得健健康康，似乎都唔使click入去「增值」，本身諗住唔理㗎嘞......。

之但係，短訊除連結，仲有下文，令唔少政協當堂打醒十二分精神。原來短訊係「有關方面」發出，話收到「上面領導」指示，每位市政協，必須喺8月31日至9月1日兩日，邀請最少10位好友向陳凱欣嘅Facebook畀like。

咁大家可能覺得，佢有佢叫，我有我唔做都得㗎啫？點知短訊又有以下一句，就係話明呢次活動，將計算喺委員「社會事務」方面嘅評分，而且委員要喺9月2日，將呼籲叫人讚好嘅名單，向負責幹事滙報喎。

點解要滙報？似乎係方便有關方面「核數」，唔達標或冇交足功課嘅委員，要有心理準備現形。

嘩，為咗谷所謂政治素人，真係可以去到好盡喎，八方相信唔少委員為咗下屆仲有機會冧莊，幾唔情願都會照做，皆因除咗係佢哋嘅功課，亦係「有關方面」嘅政績，牽連可以好大。

查實，若果真有人氣，使乜刻意去谷？至於有關Facebook嘅like，最終有幾多水份，相信大家，心中有數。