現年32歲嘅韓劇《大話妹》女星李多海，今日驚爆同31歲嘅男歌手SE7EN拍拖7個月，仲被拍得喺泰國約會，喺有圖有真相下，李多海方面直認同SE7EN嘅戀情，認真甜蜜。

事實上李多海近年專注喺大陸發展，最為網民討論嘅就係佢嘅樣貌，事關出道多年嘅李多海樣子變化甚大，早前仲被拍得蘋果肌下垂，即時惹嚟整容疑雲。

而李多海出道多年都有唔少緋聞，當年同《大話妹》好拍檔李棟旭因兩度合作而爆出緋聞；另外李多海亦曾與大陸劇《愛的蜜方》嘅對手李易峰傳拍拖後分手再復合，不過事後李多海方面就否認傳聞。