特區政改起錨，高官嗌得興奮，同時鑄造新潮語「超錯」，教院語言資訊科學研究中心噚日公佈2010年LIVAC泛華語地區中文新詞榜，發現香港舊年出現嘅新詞語，最熱門係未有得租、未有得買嘅「置安心」，反映市民好關心住屋問題。

反映市民關心樓市

第二個熱門新詞係「超錯」，反而高官嗌到唔停口嘅起錨榜上無名，呢個咁諷刺嘅結果，證明市民覺得起錨真係超錯。其他熱門新詞包括曾九招、腦退化症、迷雲黨等，中心總監鄒嘉彥教授話，上榜新詞都緊扣社會民生發展，兩個涉及樓市新詞上榜，顯示舊年市民最關心樓市問題。
至於榜上其他新詞，仲有腦退化症，即係老年癡呆症嘅新代用詞；「迷雲黨」就形容無綫電視業務總經理陳志雲嘅好友，折射小市民茶餘飯後話題，好有代表性。
呢個新詞榜涵括港、台、京、滬，兩岸四地同時上榜嘅新詞有貨幣戰、犀利哥、嗚嗚祖拉（南非魔鬼喇叭Vuvuzela）、蒜你狠、世博熱等。