行會成員鄭耀棠為死撐中聯辦主任張曉明「筲箕論」，竟將職業分貴賤，仲話如果普選冇篩選，就會好似西方選舉咁，有艷星當選，此言一出即遭鬧爆，指佢歧視艷星。人民力量主席袁彌明、甘肅省政協彭丹同灣仔區議員嘅白韻琹都有發言回應，白姐姐一句「得」埋去已經完勝：「人嘅身體係乾淨，淫褻嘅係思想。」

噚日杜汶澤已經喺facebook留言大罵：「艷星有乜問題？都好過你（鄭耀棠），只係一粒『丟那星』。」其後阿澤仲話支持周秀娜做特首，今日呢，就輪到黃秋生喺facebook發功，嘲諷鄭耀棠： 「嗰個鄭耀棠，哈哈哈哈，有冇腦0架？」

而曾演出過艷情片嘅邵音音，今午亦喺微博留言： 「鄭先生是代表單位抑是個人主見、皮士（鄙視）我的人權？以後見面還打不打招呼？」 亦有人提議音音姐:「可跟他打招呼，讓他羞愧，不用跟他一般見識或遷就他level，拉低自己修養。」音音姐就回應:「見到先算。不過我還是覺得他無心表露出的。」

音音姐坦言本身好尊重鄭耀棠，但聽完佢一番言論後，亦不禁嚇一跳，佢仲話：「事業傷殘、身體傷殘被歧視沒問題。腦殘才是真正的可悲！連最後一個相信的都不再相信了。」對於有網民回應指:「香港搞成咁皆因有呢種人坐喺行政會!」，音音姐貼咗好多個憤怒公仔寫道: 「nocomment!」 再寫道： 「我對社會的貢獻就是演好角色。我不庸又不貪怎能作兩個口？自量！」