add名人時尚丨時尚從業員轉行之道！模特兒做大廚　booker賣婚紗

蘋果日報 2020/09/17 11:16

add名人時尚A JingVanilla Yeung
    世紀疫情改變全球經濟生態，時尚圈也翻天覆地。自願或被迫轉行，怎樣好？聽聽過來人的進化之路，相信會帶來新啟發。模特兒A Jing花了幾年時間堅毅苦戰，賣樓、all in全副身家開泰菜店，日日工作17小時，開拓人生新軌道。做了十幾年模特兒公司booker的素人Vanilla，將往日配對技能重新啟動，今年在觀塘開婚紗店為新娘找婚紗，「最緊要肯行出第一步 」。
    【模特兒追大廚夢】
    堂食禁食期間，曾經在網上鬧爆林鄭月娥的港模A Jing，2018年底在上環開設泰國餐廳Clicked，開業三個月已收支平衡，面對去年逆權運動頂得住，但武肺禁堂食帶來重大打擊，幾乎倒閉。「疫情先係最可怕，泰國廚、菲律賓員工全部走人，餐廳一路蝕，咪一腳踢，洗碗工都唔敢請，因為無碗洗， 咪自己嚟囉，一日大約十六、十七個鐘響間舖度。但過去一年，我一個人都無炒過。」
    empty
    模特兒A Jing 用了幾年時間，由拜師學廚、賣樓、用半年搵舖，成功開設自己的餐廳。
    empty
    她指創業路上，最重要是計數一環，不要只空想美好。
    empty
    手腳纖幼的A Jing拜師米芝蓮二星廚Harlan Goldstein時，被要求去拳館打拳，証明體能足夠入廚房。
    empty
    現時她愛上泰國香草，不時鑽研新菜式。
    A Jing爸爸是台灣人、媽媽是廣東人，她在廈門長大，大學畢業後來港生活，一邊做室內設計，一邊做模特兒。自住生活愛上煮食，上youtube自學，更決心成為大廚，「本來已報讀Le Cordon Bleu 巴黎藍帶廚藝學校，一年半學費連生活費約100萬，唔敢啦，咁我諗不如響commerical kitchen試三個月，我投咗44張CV，無一個feedback，唯一方法係自己叩門，我去蘇豪行一圈、去蘭桂坊行一圈，見到門口請人就入去，帶住我自己過去七年煮過嘅三千幾道菜，燒咗一隻CD，Show我嘅passion。」認真終得到回報，朋友推薦了她給一位米芝蓮二星大廚，面試時，卻要她去拳館。「 因為佢驚我體力，意志唔得，我話我好tough，咁打咗三四個鐘，我仲健在，佢就OK。」
    empty
    十幾歲入行，在內地得過不少模特兒奬項。
    empty
    A Jing (右一) 曾在元朗為鄧達智行騷。
    為了圓夢，她在2017 年賣了北角的迷你單位，加上做模特兒、室內設計師所賺的錢，all in 五百萬搏一舖，成功開舖。現時仍然捱住貴租，個個月蝕錢，但賺了許多友情，員工也自願早放工為她慳工時出糧。她過來人經驗之談，「計掂數」是最最重要！「有啲嘢好理想、好完美、好浪漫，但條數你計唔計得掂先？你生唔生存到先？如果計得掂，你又有把握， 就搏啦，因為我估，冇咩事會恐怖過呢一兩年嚟嘅事喇。後生咪搏一搏，大不了輸咗咪重新嚟過。」她希望捱過疫情後，再開分店，單一間的話，你點做，都係為業主打工，要做到有中央廚房，先可以control個食品成本，咁你先可以真真正正賺錢。」至於模特兒工作？「疫情下無乜casting，但會一路做，唔認老！」
    empty
    她表示不認老，會繼續做模特兒。
    【Booker開婚紗店 】
    時尚行業中的Booker (模特兒經理)，簡單來講就是模特兒推手，為她們配對工作、推薦給廣告商、時尚雜誌等。現時KOL橫行網絡，人人都有平台自我宣傳，booker角色比以往大為改變。Honey Bird Bridal老闆娘Vanilla Yang做了十幾年booker，近兩年決定轉行，今年疫情下在觀塘開了婚紗公司，素人身份和朋友合資幾十萬，買了百幾件婚紗就上馬開業。
    empty
    曾經任職StarzPeople、Rolemodel的Vanilla，今年轉業兼創業在觀塘開婚紗店。
    empty
    為新娘子配對婚紗的過程，她坦言和以往做booker一樣開心。
    「我始終覺得，一啲想做嘅事要趁後生、仲有本錢時去做。」任職不同公司做booker期間，Vanilla照顧過的藝人，有當時未有歌派台的周柏豪，施念慈公司旗下的陳靜、混血女模Cara G.等。印像最深刻是當年成功「掘到」仍未出道的Janice Man，「做booker都想搵啲有talent嘅出嚟，記得當時響公司個櫃度摷到Janice嗰張comp card（模特兒資料卡），就約佢上嚟見吓，覺得呢個女仔OK，跟住就試吓push多啲俾啲media去影，慢慢開始有print ad ，到TVC，就開始紅到，呢個都有成就感，好開心做到一個咁多人鍾意嘅女仔出嚟。」
    empty
    她指不少booker年代認識的模特兒、工作伙伴，如今仍然是朋友。
    empty
    膽粗粗買了過百件婚紗在年頭開業，一開就遇上武肺疫情。
    轉業過程中，她覺得任何的工作經驗都會派上場，從自己的長處經驗出發總會有得着，「其實booker係一個中間人角色，連繫模特兒和客人，中間協調。𠵱家我就係幫新娘和婚紗做matching，配對她們心目中嘅dream dress，類別不同，但性質係相近嘅。」她做模特公司時的經驗亦派上用場，「好多女仔膊頭位都會向內彎，我會提醒新娘，要open chest拉橫個膊同心口，影相時會精神啲、靚好多。」疫情下，婚禮界大受影響，試過新娘子租好婚紗，家人卻確診要隔離，擔心生意其實更擔心新人心情，始終多年經驗「湊人」最緊要，Vanilla現時前景未明，預了最壞打算蝕錢離場，但依然鼓勵年輕人追夢，「我回望呢，其實肯行出第一步、走出個comfort zone係好重要，你唔行出第一步，永遠唔會知你嘅next step會發生咩事，只要做好最壞打算，係承受到嘅，咁就feel free行出去啦。」
    場地: CLICKED Restaurant & Bar、Honey Bird Bridal

    -----------------------------
    《蘋果》英文版免費試睇：了解更多
    英文版已登錄《蘋果》App，立即下載/ 更新：iOS / Android
    -----------------------------
    支持蘋果深度報道，深入社區，踢爆權貴，即Like蘋果專題及調查組FB專頁！