繼足總盃大炒英冠洛達咸後，曼城禮拜三喺英聯盃四強首回合，又喺主場派咗九隻光蛋畀英甲嘅伯頓。據《Opta》統計，曼城追平咗列斯聯喺1967年所創下連續兩場入七球或以上嘅紀錄，亦係球隊史上近30年嚟最大勝仗。至於呢場亦係箭頭加比爾捷西斯職業生涯首次大四喜，今季累積12球，僅次於首席射手阿古路嘅14球。