李蕙敏(Amanda)今日喺新城宣傳新歌《不分不散》，講到呢首係sweet歌，佢笑住話：「啲人成日諗我唱慘、狠同苦情歌，印象好深刻。」會唔會因為婚後想唱sweet歌﹖Amanda話：「唔係因為咁，其實近年社會氣氛比較辛苦、緊張，大家好多負面情緒，作為演藝界都希望有啲貢獻，將開心感染畀大家。」

為新歌宣傳，工作開始忙，英籍老公SergeMicallef會唔會唔習慣﹖Amanda話：「佢都好忙，各有各忙，但周末會見多啲，我盡量唔安排工作喺周末。」講到有網民指Amanda、盧巧音同趙學而都係「至狠女歌手」，各有夭心夭肺嘅分手代表作，所以叫佢哋開復仇者聯盟演唱會，Amanda笑住話：「係呀，但我呢期幸福呀，幸福住先啦，暫且唔好復仇住，做一個開心啲嘅人先，我仲有好多代表作，隨緣啦。」

李蕙敏指兩年前曾開個唱，O依家都好想再開，因為嗰次有太多歌冇唱。問到佢老公鍾唔鍾意唱歌？Amanda話：「佢細個係合唱團，但大個變聲就冇返。」唔知佢老公識唔識佢啲歌？佢話：「梗係唔識啦，但佢話認得melody。」