唐英年出身紡織業世家，呢種資產階級成份，地、富、反、壞、右「黑五類」背景，令人質疑佢不識民間疾苦，係登基特首最大障礙之一，估唔到佢原來早就背叛自己階級，自爆六十年代留學美國時，參加過中國同學會，認識唔少來自台灣、香港學生。當時係文化大革命高潮，中國同學會有搞學習《毛語錄》活動，唐唐坦言有參加。
八方相信唐唐睇完《毛語錄》，肯定獲益良多，否則唔會到今時今日仍然歌頌「紅寶書」，唐唐話：「我發覺毛澤東有好多思想都可以應用於現代。當時同學間亦會互相討論，我覺得求學時應該除咗學習，仲要思考，所以呢種討論很好。」
《毛語錄》要年年講，月月講，天天講，唐唐要做特首，唔知有冇貼身袋住一本《毛語錄》以示忠貞？跳忠字舞不能只有一種姿勢，近日愛國要講保衞釣魚台，唐唐話唐家祖宗係明朝名將唐荊川，差不多500年前唐荊川曾經打退日本人，係抗倭英雄，三年前唐荊川銅像喺常州揭幕，唐唐話特登帶埋三個女參加，目的係令女兒更了解自己家族歷史，亦學習中國文化源遠流長。