當年今日
關於我們

【短片】【戀富二代退出娛樂圈】Rika怕記者甩底活動Hazel爆未嫁得

蘋果日報 2016/05/16 06:00

蘋果香港即時娛樂G-1格鬥會Rika退出娛圈Hazel就算PK都要做打女

今晚「G-1格鬥會」喺銅鑼灣舉行慶功宴,一眾女選手唐紫睿(Hazel)、郭思琳(Margiela)同龍小菌,主持柳俊江同Leo以及星級教練徐家傑都有出席。

今晚會係Hazel同郭思琳嘅決賽,結果係點就要等節目出街先知。原本ViuTV所發嘅通告上面寫咗劉燕妮(Rika)今日會出席,但係佢同大會講「突然間有事」所以未能出席,鄧穎芝(Vangie)都係話有工作在身嚟唔到,仲有王蘊妮(Mimi)就話去咗世錦賽冇現身,所以啲是非人物今日都係冇出席㗎。

現場所見,一眾女選手都係同佢哋各自嘅導師一齊現身講幾句,Hazel就好多謝啲師傅對佢一啲都唔留手,喺操練嘅時候毫不留情咁踢佢。郭思琳就講返初初啲師傅見到佢,覺得佢做掌上壓都危危乎,結果可以走到今日,仲可以上總決賽嘅擂台。

Hazel接受訪問時就被問到點解你嘅好友(Rika)今日冇嚟呀?佢就話其實噚晚都有同Rika傾電話,其實自己都好想佢嚟㗎,都勸咗佢好耐;不過Rkia知道今日有好多傳媒在場,而且佢早前又講咗退出娛樂圈,所以就覺得今日唔係好適合出席。佢仲話Rika都覺得好唔開心,自己為節目付出咗咁多,但係又嚟唔到呢個活動。咁Rika係咪出嫁喇?Hazel就答﹕「佢未嫁,都係啱啱開始拍拖啫,佢男朋友我都識嘅,係我介紹俾佢識,希望大家唔好葡萄佢哋嘅戀情啦!」又話Rika都唔敢喺ig到出太多post。咁Rika係咪因為識咗o依家個男朋友所以退出娛樂圈㗎?Hazel就話﹕「咁又唔係,其實《G-1》都令Rika受咗好多壓力同委屈,佢都為比賽付出咗好多,又打到成身傷咁,但係好多人都話我哋喺到搞是非同博出位,其實自己喺呢段時間嘅情緒都唔係幾好過嘅……」講到呢到Hazel仲有啲哽咽o添……

佢繼續話,睇到節目出街之後自己嘅情緒都好反覆,明白到做娛樂圈就要接受輿論壓力,自己咁努力都俾人鬧,可能香港未試過有呢類型嘅節目出街,所以就引起咁大爭議。咁Hazel有冇考慮過退出娛樂圈?佢就話﹕「條路係自己揀嘅,就算PK都唔好喊,娛樂圈呢條路就算跪住都要走,自己會繼續向打女嘅方向進發。」