現任問責局長唔少都係前朝老董遺臣，好似財經事務及庫務局局長馬時亨咁，當年就喺老董信任嘅阿松引薦下入局，點知兩個伯樂竟然先行告退，肥馬冇咗靠山，難怪唔被睇好有得留低。既然有被out危機，肥馬當然要諗計仔𢱑撈。噚日佢喺電台節目，擦完煲呔鞋後又自吹自擂，仲同老董同阿松劃清界線；咁識賣口乖兼睇形勢做人，同煲呔簡直天生一對，睇怕又有得撈多五年。究竟肥馬講咗乜？之唔係佢一馬當先，高調為煲呔施政報告護航囉。呢份施政報告，有眼睇嘅市民都見到，煲呔只向有選票嘅人士派糖，完全無為香港勾出個長遠藍圖，難怪施政報告令煲呔民望插水㗎。

同前朝劃清界線

點知肥馬護主心切，力撐煲呔得嗰八個月任期啫；如果佢有遠見、有藍圖，咪又俾人話佢，所以覺得公眾嘅批評好唔公道喎。嘩，咁講法，煲呔喺呢段任期內咪乜都唔使做？肥馬都要顧吓擦鞋係咪擦到出晒界，擦埋落地下咁無公德心先得㗎。
可能佢嫌擦鞋唔夠勁，跟住再上演割席好戲。入局無耐就因為仙股事件搞到鞠躬道歉嘅肥馬，當時因此成為民望最低嘅局長；如果唔係老董保佢，肯定被out，唔使旨意做到今時今日。點知噚日主持人問佢，對於兩位落台伯樂點睇時，佢就有啲劃清界線味道，話最緊要係自己個心，唔係為當時嘅特首同財爺做嘢，邊個在位都唔重要㗎，因為自己嘅服務對象係市民喎。呢頭先話坊間對煲呔嘅批評唔公道，嗰頭又話要服務市民，肥馬唔係精神分裂呀？
咁都唔止，佢跟住就自我吹噓一番，話仙股事發後四年嚟，自己民望由谷底回升，最大嘅感覺係「市民嘅眼睛真係雪亮嘅」，覺得市民睇到佢𠵱家有做嘢，唔會因為一次事件，永遠就對佢印象唔好，佢最希望畀到年輕人睇到咩叫「永不放棄」。呢番「𢱑撈之言」，真係聽到八方毛管戙。
當主持人單刀直入問肥馬一句：係咪有得留低？肥馬就話自己做唔做係一件小事，搵到有為之士做嘢先最緊要。咁識講嘢，要搞政治騷嘅煲呔無理由唔識貨啩？