中西區前東華區議員、民建聯蕭嘉怡因為加入政府做政務司司長張建宗嘅政治助理，中途離任觸發補選，建制派最終派出報稱獨立嘅人出選，卻輸咗畀民主黨伍凱欣，認真失威。痛定思痛，據聞佢哋來屆區選，一定唔會再放過呢一席。據知民建聯擬派出靚女小花張嘉恩上陣，試圖複製該黨另一小花植潔玲喺東區佳曉補選嘅勝選方程式，區內不時見到佢嘅旗海；今日開學日，佢都一早落區開站見街坊，攻勢好凌厲。

至於上屆民主黨吳兆康爆冷突圍，擊敗獨立建制派對手當選的嘅半山東選區，據聞民記亦有意「插旗」，近日已派出外型唔差嘅社區主任莫淦森落區宣傳，莫淦森係該黨立法會議員張國鈞嘅全職議員助理，張仲同佢一齊見過運房局局長陳帆反映區內交通問題。睇返莫淦森Facebook個人簡介，原來佢喺區內高主教書院由幼稚園讀到中學，都算佔盡地利，佢之後去咗英國普利茅斯大學讀書，再喺香港理工大學讀理學碩士，同民記嘅傳統區佬style有啲唔同，有指27歲嘅佢今年5月先正式入黨，黨齡淺但好受重視。

而喺該黨主席李慧琼同張國鈞嘅地區辦事處，就已經貼咗呢對「金童玉女」嘅宣傳海報。家陣民建聯喺中西區區議會15個議席中已佔5席，若然攻陷埋呢兩席，就有成7個區議員，民主派則減至3個，形勢好危急喎。