李思欣噚日朝早剛喺加拿大拍戲返港，時差仲未調節好，今晚就唔好彩發生意外。思欣今晚約咗朋友喺銅鑼灣晚飯，點知喺扶手電梯發生意外，跌傷右膝，傷口非常深，老公范振鋒見狀，即時送佢去養和醫院睇急症，醫生見到傷口，馬上安排佢照X光、止血同洗傷口，仲要為傷口縫針。

思欣又痛又驚，佢於等候期間將血淋淋傷口相貼上facebook，佢話：「上自動扶手電梯仆到，冇咗忽肉咁，要連針好驚。」記者到達養和時，思欣坐住輪椅並已接受包紮，準備離開，據知思欣一向有耳水不平衡，時差又頻撲，范振鋒見老婆傷腳都肉赤，佢話：「頭先佢（思欣）好急又暈。」而思欣就透露縫咗5針，因為落扶手電梯時太急，所以先會跌倒。