於新片《洩密者們》中飾演馬來西亞警察的張智霖（Chilam）及飾演香港警察嘅吳鎮宇，日前喺尖沙嘴接受訪問，《洩》片講述馬來西亞爆發高危傳染病，當地最大藥業董事長（鄭則仕飾）嘅大兒子離奇自殺，警長李永勤（張智霖飾）接手調查，香港警察王大偉（吳鎮宇飾）合作追查案件。期間有自稱「洩密者」嘅秘組織透露藥業界黑幕，有藥業藉瘟疫發災難財。

Chilam話為咗今次角色，花咗唔少時間同翻譯學習馬拉話，Chilam話：「要講馬拉話，一個鏡頭NG 20、30次，自己都唔知自己講乜，我講完對手都笑！有當地翻譯不停教我，自問語言天份唔着，但真係吸收唔到，真係唔知自己講乜，因為馬拉話唔同韓文、日文，冇乜特徵，所以好難學。」

雖然係警匪片，但係Chilam話拍呢套戲，最辛苦嘅並唔係動作戲，佢話：「拍呢齣戲，個胃掙得好緊要，因為我哋喺馬來西亞檳城拍，係咁食榴槤，依山食山，發現原來好多品種，除咗我哋平時食嘅貓山王，仲有好多其它品種，有一種叫『林鳳嬌』，因為林鳳嬌話呢隻真係好食，但係嗰日沽清咗。我以前唔食榴槤，當時拍《衝上雲霄》，鎮宇佢哋食，我被同化咗，係好正，鎮宇仲表演食榴槤飲酒，佢話冇事。」

鎮宇笑言，今次喺大馬拍戲，最忙係一齊食，鎮宇話：「因為都冇乜嘢做，辛苦在多嘢食，飛車替身做晒，我哋補幾個鏡頭，替身拍飛車，我哋喺隔籬食榴槤，因為我哋喺榴槤山度拍，萬歲就萬歲榴槤，我哋食咗貓山王、蘇丹、紅蝦、竹腳。當然唔可以一啖榴槤一啖酒，相隔一段時間就可以，但係真係好肥。」

化妝：Hetty Kwong（張智霖）、Kargo Leung（吳鎮宇）
髮型：Vic Kwan of ii Alchemy（張智霖）、Joe Kwong（吳鎮宇）
服裝：Hugo Boss（張智霖）
場地提供：馬哥孛羅香港酒店

精選娛聞，喺晒《娛果》
http://fb.com/appledailyent