男子組合E-Kids成員、39歲的阮民安(Tommy)近日為抗爭勇於發聲，同時又上街表達訴求，8.31更到銅鑼灣busking為港人打氣，他見受到巿民歡迎，他今日就在facebook宣佈暫定10、11及12月的其中一個星期五會舉行「沒有國泰，還有民安2.0演唱會」。Tommy表示全港學生免費入場，現在要視乎人數反應才決定場地。他表示這個演唱會沒有主辦單位，為了作出預算，Tommy指跟團隊決定先用十日，由今晚午夜12時開始至到9月17日午夜12時止先接受巿民的登記和購票，再用七日去點算和統計，Tommy會於9月30日之前公佈演出場地及日期，他一再強調如book不到場會即時退票。不少網民都表示支持，也有網民立即行動購票：「已經買咗飛，加油，利申：我起碼5年冇睇任何香港歌手嘅演唱會，期待你嘅表演。」Tommy即回：「衷心多謝您！我會努力！香港人加油！」

正當Tommy着手籌備演出，即有報道指有債主向他追數，有網民向Tommy追討去年一月他跟E-Kids兩子在旺角麥花臣舉行的演唱會欠下的化妝費，另一日本達人Amber也向Tommy追債。

Tommy高調撐逆權運動，卻惹來債主臨門，他今日向《蘋果》短訊解釋：「其實我之前都有喺我facebook見過呢個msg，呢條題太X嚴重啦，我亦都好憤怒，我簡單解釋一吓啦，其實我真係唔係好想講，如果呢個時候有啲仆街有心人想Spin風向，我梗係奉陪到底啦！首先講化妝先，上次2018年個show係阿倫(E-Kids成員Alan)嘅女朋友公司做主辦嘅，我只係負責唱歌，但因為演唱會資金唔係太充足，所以我基本上係一個大打雜，由開會、揾場地、借衫、搞製作、做音樂、約記者、social media，喺日本揾朋友幫手搞音樂都係我一個做晒，喺件事嘅所有人都知！但諗住大家一條心，做好個show，所以真係冇所謂，但而家俾人擺上枱！因為場show賣得好差，蝕咗錢，所以最後嘉賓利是、慶功宴、after party錢都要我哋三個自己拎番錢出嚟，我係畀最大份嘅，因為有啲主意係嚟自我，所以我決定孭最大份！但當日完show，其中一個協辦單位嘅老闆都知我哋三個有困難，所以都幫我哋畀咗呢啲錢先，所以好感激佢，至於呢個化妝費，主辦一路都冇畀，我都係知嘅，但我都一直有問，不過完咗場show之後，阿倫同佢女朋友嘅關係都淡化咗，所以間公司都冇再搞，之後點我就冇理啦！」

Tommy直認收到化妝師追數，他續說：「我收到化妝師朋友問化妝費嘅事時，我即時聯絡化妝師，所有對話有cap圖，而最主要係佢同我講係因為寫我個名出嚟，先會有人注意，我打個突。而對話後，佢已經私底下同返主辦方搞掂咗件事，冇再揾我，但我唔明呢個時候畀料傳媒，居心何在？我知道咁多年歷史，我嘅往績係唔好，我亦從不否認，但唔係衰一世掛，其實到今時今日都仲久唔久有以前嘅財務公司揾我抽下水，拎番張十年前嘅單嚟又咁又咁，但坦白講，我已經所有嘢都處理咗，警又報過！但我知講呢樣嘢係大家最易入到我嘅。」

Tommy否認欠日本達人Amber錢，他解釋大年前大家有在日本見面，對方只是sales。他說：「佢同Eva識咗好多年，所有人都知，嗰時佢哋想一齊去日本發展，但間公司簽Eva唔簽佢，佢冇得做，佢話借錢畀Eva，仆街啦，可能係一次半次食下麥當當，畀過吓錢，有時一齊買嘢染頭畀咗先呢啲囉！喂，如果咁都計，咁佢哋咪全部爭我好X多錢，呢咁多年，全部人有邊次出嚟食飯，唱K，飲嘢埋單唔係我搞，而家出嚟嘅呢啲人，有邊個冇食過我，飲過我，如果我要計，有排計。大是大非前，搞咁多小動作，做乜X吖，搞我，我頂到，而家你哋想搞埋我老婆，我拎埋條命都同你玩。只會回應一次，唔會再有任何回應。」

Tommy為表清白，更出示多張上月跟化妝師對話截圖以示清白，當中Tommy有強調會為對方追回2萬元薪酬。
-----------------------------
【撐學生】
召集有心人 撐學生全年睇《蘋果》
立即按此