商台DJ雲妮於年初請假半年，原來是要跟癌魔搏鬥，在死神之手逃出生天的她，前日復工開咪自揭曾患癌症三期！做完手術出院那天，梁詠琪（GiGi）到醫院接雲妮返家，為她拍了這張笑容燦爛的舉V相片。

走過生死峽谷的雲妮接受《蘋果》訪問，在電話中傳來笑聲：「呢張相佢難得影得我咁好，哈哈哈，當然有小執過膚色，只係瘦咗啲，因為啱啱做完手術。」

雲妮不想公開患了那種癌症：「可以坦承話畀大家知我係癌症第三期，都要經過一段時間接受自己，因為我係獅子座，自尊心好強，成日覺得可能自己做得唔好，記咗一個缺點，慢慢接受自己係一個病人！」

原來雲妮於今年叱咤頒獎典禮期間發現身體出問題：「本身冇好大唔舒服，但覺得有啲唔妥，因為屋企人去旅行，唔想影響到大家，我諗住過咗農曆年先睇醫生，所以一發現已經比較遲，已經第三期，因為幸運之神眷顧，先可以大步檻過，好想提大家，一有唔妥就要睇醫生，我呢隻咪叫做諱疾忌醫。」
 
面對癌魔，雲妮變得堅強：「我一定會醫番好，我唔會死！我字典冇抱怨，所以我用樂觀性格接受同面對呢個病，我唔驚！」雲妮將患病事情通知商台高層Rita，停工半年：「商台係好有人情味嘅公司，我唔需要擔心有冇糧出，最緊要做借鏡嘅話，我提大家一定要買醫療保險，好在我有三份保險，加上電台對我好支持，好現實問題，當你要停工半年，經濟、醫藥費可以好安心好無憂，對醫病好有幫助。」
 
因為電療會甩頭髮，雲妮剃掉一頭青絲，並接受化療雙管齊下：「化療過程聽講好辛苦，我家姐都係行醫，佢比較另類少少，喺日本同美國學咗十幾年仁神術氣點治療，每日守護我治病過程，呢個treatment可以幫到化療病人強化身體，將化療副作減到最低，我完全冇嘔，其他病人化療後要冚被身體好虛弱，藥物反應通常十日八日唔舒服，但我只係四日唔舒服，好似重感冒周身骨痛，唔算好辛苦，所以好多謝家姐。」

成功戰勝癌魔的她說：「坊間話電療化療攻擊性太強，副作用令大家好驚，但用呢兩個方法治療，你思想要改變，真係要當化療藥物係甘露，電療嘅光唔係幅射，而係充滿希望嘅陽光，你要信呢啲藥物先可以幫到你。所以我係最幸運病人，咁多次化療之後，我係最後一包藥痛到不得了，直情好似畀刀𠝹，可能血管同藥物已經好抗衡，我做完化療個幾月，手位依然瘀黑，諗番好彩唔係開始做化療時候痛，如果唔係我可能放棄咗！」

 入行25年的她，有幸認識了一班真朋友：「好多人好感激，而實質上精神上支持到我係我契哥學友，佢知我出事，係唯一一個問我要唔要錢嘅支持：『搞唔搞得掂？』加上佢全年去唔同地方巡唱，但佢keep住搵我，要知道我嘅狀況，大家都知學友係拒絕接受新事物，佢唔會上網，但佢不斷幫我搵資料，我哋仲有互相支持嘅承諾，親人一般，超越咗朋友。」

另外雲妮還多謝GiGi：「佢用母親角度同我share，因為我好驚媽咪擔心，刻意喺媽咪面前好正能量撐住，後來我同GiGi講我好辛苦，GiGi話如果囡囡Sofia有乜事，佢都會好強！我用GiGi嘅建議，喺媽媽面前將我懦弱一面話佢知，反而令到媽咪堅強咗，更加照顧我同保護我，令我哋感情更昇華更親密。仲有楊采妮，佢好似一個太陽，不斷散發溫暖畀我，佢喺新加坡都whatsapp叫我返工加油，之前我爸爸病走咗，佢爸爸都離開咗，佢係天主教徒幫我禱告，真係好到冇得頂。」
 
雲妮說：「呢個病真係越嚟越普遍，有病後搵資料，其中包括心靈書籍，有呢個病可能情緒管理有關，所有疾病源頭嚟自唔開心，都分析過可能我爸爸嘅離世，嗰刻我逞強，將悲傷隱藏咗，加上作息時間、飲食又唔注意，所有嘢加起上嚟，所以唔好睇輕，要坦白面對自己失意唔開心傷害，你一定要搵出口，如搵人傾訴、喊一場，要有樂觀心態，但難過時要難過，將唔開心表達出嚟可以釋懷，或提升智慧處理事情，希望病人同屋企人互相扶持，今次經歷更加覺得屋企人係最強後盾。」