喺某個平行時空下，拜仁慕尼黑門神紐亞未必有家陣咁大紅大紫，要不是以下呢位競爭對手喺2010年世界盃前肋骨受傷…德甲球會緬恩斯周四宣佈，免費由漢堡簽入32歲門將艾達，雙方簽約兩年。艾達過往先後為利華古遜同漢堡上陣255場，並有12頂國家隊「喼帽」，但佢自2013年後未曾入選德國大軍，連漢堡正選席位亦俾馬菲尼亞搶走，最終選擇他投：「球會寧靜而專注嘅氣氛好適合我，我有預感會有令人振奮嘅事情發生。」

艾達早年靠佐治畢特停賽後搶走利華正選，喺國家隊聲勢甚至比紐亞更勝一籌，可惜佢喺南非世界盃陣前受傷，自此紐亞奠定德國正選門神一席，雙方前途亦各走極端。無論如何，艾達過去幾季仍然不時有神級撲救，希望佢可以重振雄風！