鄭俊弘同雷深如（J.Arie）今日喺小西灣出席「有聲好書」全港中學生聲演比賽，J.Arie透露最近為新歌《神奇女俠》MV，染咗一頭橙色頭髮，佢笑指：「冇理由着套神奇女俠件衫出嚟，都冇人想睇，我自己都唔想睇，所以唯有染頭，染咗6、7個鐘。」屋企人有冇被嚇親？J.Arie笑住話：「梗係有啦，試過有人問我係咪假髮，我話係真㗎，佢哋問我點解要傷害自己身體，唉，我不入地獄誰入地獄。」

問鄭俊弘會唔會試下改變造型？佢話：「為首歌就可以，但如果好極端咁改自己形象，剷頭呀、G-DRAGON呀，咁就唔適合我。」

問佢哋有冇試過參加聲演比賽？鄭俊弘話：「朗誦比賽就冇，但15歲第一次參加過唱歌比賽，當時好緊張；上年我有份做呢個比賽嘅評判，參加者只係中學生，但佢哋好成熟，感受到故事入面嘅情緒，有啲仲講到喊。」J.Arie笑指經常被人取笑講嘢好似朗誦：「我講嘢好字正腔圓，向來都好着重咬字，所以錄音唱歌嘅時候，反而被人話咬得過正，對我嚟講仲難，要糾正番我向來字正腔圓嘅習慣。」

精選娛聞，喺晒《娛果》
http://fb.com/appledailyent