李錦聯一直是無綫婦女節目《都市閒情》的台柱，主持「今晚食乜餸」環節，為師奶買餸提供不少貼士。但李錦聯效力到本月底便會離開服務了二十五年的無綫，相信以後都很少機會聽到李錦聯再在螢幕前講金句「靠得住」，他與「大王」安德尊不時在節目中有肢體碰撞，以及示範「無敵鴛鴦鏟」的場面也會成絕響。
問李錦聯是否做到本月底劈炮離開，他日前在電話中直認說：「始終自己年紀有番咁上下，諗住想休息享受吓人生，兩個月前有試過同監製講，話原本一個禮拜做兩日《都市閒情》，可唔可以減到變一日，但監製話做一日太少，咁我就話不如停一停。」

服務無綫二十五年的李錦聯，決定離開都顯得不捨，他說：「之前同大王拍《區區開伙》，原意係想我同佢喺節目你窒吓我、我寸吓你，啲觀眾最想睇呢啲箒，咁我同大王都有啲火花嘛，講嘢有時踩吓界、玩吓諧音，例如大王飲嘢，我就順口問句：『你仲乜『飲』嘢？』其實我冇講粗口㗎！不過監製話唔批，可能佢哋覺得個節目放喺合家歡時間啦，佢哋驚俾人投訴，所以咪cut走呢啲對白囉，咁你知啦，寫稿嗰班後生仔唔敢孭飛嘛，會寫啲唔會瀨嘢嘅對白，搞搞吓，我都冇乜心機做，佢哋話講乜就講乜啦！」令他開始有意興闌珊感覺。
李錦聯離開無綫雖感可惜，但他也不想被框着，成世做煮餸佬，他說：「我諗出面十個人有九個半都知我教煮餸，但其實我出面都有好多嘢做，幫好多餐廳、廚具做代言搞推廣，再唔係休息一排，會有一個新形式，試吓自己喺網上做條飲食channel都未定呢！
採訪：王梓嫚