已離開無綫的關菊英，今日出席活動時，力撐噚日向無綫公開遞辭職信的陳國邦，盛讚對方非常專業正面，即使場戲冇對白，只係搭住菊姐膊頭，一樣可以俾到戲對方。台柱汪明荃亦支持陳國邦離開的決定，今日凌晨於微博留言道:「國邦，看到你這封感性又正面的公開信，很想留幾個字為你增加正能量：你是TVB眾多演員/同事中，一位我非常欣賞的好戲之人！加油呀！敏莊，加油呀！」

去而復返、謙稱返大台拍劇係「再培訓」的廖啟智，噚日出席公開活動時，也支持陳國邦的決定。樂易玲就表示對陳之公開信感愕然，又稱無綫會盡力挽留，因為公司一向重視對方，而且其演出之角色戲份一向吃重……

陳國邦離開無綫，成為熱話，就連陳本人都想像不到，外間反應是如此大。身在台灣演出舞台劇的陳國邦，經過一夜沉澱，今日接受《蘋果》訪問時，就透過WhatsApp錄音回覆:「我係陳國邦，我知道出咗呢封信後，作為一個藝人，一定會有一啲嘅反應，不過的確，依家嘅反應，的確比我預期嘅大。我估唔到汪阿姐，或者菊姐，甚至一啲，藝人、導演，無論係公開定私底下，發訊息俾我，都支持或者贊成我呢一個決定。我相信呢啲係我認真工作換番嚟嘅尊重，我好多謝佢哋。」

陳國邦續道:「我亦都知道，我演出完舞台劇，返到香港之後，會有一啲訪問，我係需要做嘅。到時我會喺呢啲訪問裡面，可以再詳細咁交代我點解會有咁嘅諗法，同埋點解我會做一個咁樣嘅行動。」

換言之，陳國邦離開決定未改。