只願一生愛一人
許志安拒絕生育 力保濃情空間
許志安與鄭秀文相戀十一年,經歷幾許風雨,多番離合,但最終兩人還是走在一起。自言感情生活愉快的安仔,為了長保與女友間的濃情蜜意,更寧願不要子嗣繼後香燈,只求與情人在二人世界中相守到老。
敏感地帶鄭秀文
許志安對「鄭秀文」三字十分敏感,不太願意談論感情事,希望可以保留僅餘的私隱,更表示將來縱使結婚,亦會盡量保密。雖然他們很有默契地不談感情事,但看Sammi與安仔在《勁歌》頒獎禮中真情流露,安仔所發表的「廚房宣言」不但感動了台下的鄭秀文,同時亦打動了不少fans。
「你只屬於我」
(許志安:許 記者:記)
記: 你喺無綫《勁歌》頒獎禮發表嘅廚房宣言,令人好感動,攞咗「最受歡迎男歌星」獎後,你又喺跑馬地同Sammi及一班老友齊齊慶祝,其實你同Sammi係咪未分手?
許: 感情事我真係唔想講,總之我可以話畀你聽,我感情生活好開心,感情生活一直冇變過。嗱!我冇講過嗰三個字,你唔好幫我加落去。
記: 邊三個字呀?鄭秀文?點解咁怕講感情生活呢?
許: 兩個人喺埋一齊開心咪得囉!點解乜都要俾人知道晒。
記: 將來結咗婚,會唔會生小朋友呢?
許: 我唔知將來諗法會唔會改變,但呢一刻我唔想婚後有細路仔,因為我唔想有其他人破壞咗二人世界,感覺就好似係「你只屬於我、我只係屬於你」咁,如果有咗細路,令到我哋嘅世界只係不斷談論個仔,我就覺得好冇趣味,愛一個人要咁先可以一生專注。
浪漫毋須刻意
記: 你係咪一個好鍾意浪漫嘅人?
許: 我唔係咁識去營造浪漫,自然流露就會,我舉個例,好似凌晨三點,我要換車胎,嗰晚雨好大,佢一直陪住我整車,我就會覺得好浪漫,寧願嗰晚有十幾條車胎要換。
記: 你講嘅例子,係咪發生過喺你同Sammi身上呢?
許(笑得很甜): 我都話舉例咯!
記: 頭先你話唔想有細路,如果婚前或婚後意外有咗,你會點?
許: 有意外梗係另當別論。
記: 咁你同你「好朋友」,究竟邊個負責做安全措施,係咪由你戴安全套?
許(思量一會,面露尷尬笑容): 總之我有辦法。