日前被指同畢彼特（Brad Pitt）復合嘅安琪蓮娜祖莉（Angelina Jolie），近年都係做導演多，上套做演員嘅電影已經係2年前，仲係同畢彼特合作講婚變嘅《緣海假期》（By the Sea），不過最近佢就指自己想做返演員，亦打算重拾工作。

近日安琪蓮娜接受訪問，指自己因為「家庭問題」抖咗一年，又因為照顧小朋友停晒啲工作。「現時我冇電影喺手想執導，所以我會演返戲，我已經休息咗一年，因為我嘅家庭問題。」佢更加指嚟緊拍嘅就係大受歡迎嘅《黑魔后：沉睡魔咒》（Maleficent）續集。「我而家正打算拍《黑魔后2》，好期待當中嘅趣事，又收到《埃及妖后》（Cleopatra）嘅劇本。」睇嚟安琪蓮娜已整裝待發全面復工。