當年今日
關於我們

智取大市:雅士利高增長未反映 - 晉佳

蘋果日報 2014/01/14 00:00


噚日港股朝早高開震倉,一樣震唔散大戶嘅心情,近排半新股就出現細價散水、中價依然強勁嘅現象,環亞智富(1390)噚日升兩成,嘉里物流(636)勁升8%。不過,呢類概念半新股都唔係肯衝就得,中滔環保(1363)上星期五破頂,噚日跌半成。
除咗個別半新股升極都有之外,開始見到個別非炒作概念股份有轉強迹象,噚日就有美國概念股同奶股,創科(669)、敏華(1999)、彩星玩具(869)呢幾隻主攻歐美市場嘅股份都似想破頂,配合基本因素理想,要博一成至兩成回報似乎唔難。至於奶股方面,合生元(1112)股價喺高位輕微上傾,至於蒙牛(2319)噚日升2%都似想破頂,佢個仔雅士利(1230)最近一個月喺4.5元附近試咗兩次底,相信整固已經完成,噚日升3.8%至4.69元,高過3.5元嘅蒙牛全購價、淡馬錫厚樸入場價只有34%,以蒙牛嘅眼光,晉佳唔相信呢個價冇上升空間。
empty
盈利每年最少升兩三成
一隻優質嘅行業龍頭股要做收購,通常係為咗尋找新增長動力。蒙牛咁多年嚟盈利增長穩穩定定,按年盈利增幅可以超過兩成,不過,2012年盈利倒退咗兩成,舊年上半年好番啲,但盈利增長16%,都比過往有放緩迹象。
大手收購雅士利呢個動作,證明蒙牛認為雅士利可以幫佢拉高盈利增長幅度,方便向股東交數。晉佳估計,雅士利每年盈利增長至少兩、三成,往績市盈率28倍,反映現時估值會有相當大支持力。而想買蒙牛嘅投資者,相信中長線都會轉吼雅士利。
可利用蒙牛銷售渠道
至於收購對於雅士利嘅好處,就係可以利用蒙牛龐大銷售渠道賣奶粉,亦可利用蒙牛同分銷商嘅關係,獲得更好銷售條件,而顧客亦都會因為蒙牛品牌而對雅士利信心增加,仲有雅士利喺新西蘭引入奶源做較高檔次產品,亦會隨住蒙牛品牌同管理,令高檔次產品成功打入內地市場機會大增。上述因素加加埋埋,雅士利增長潛力會相當高。
晉佳統計過,一般被全購後保持上市地位嘅股份,市賬率終會有一日超越自己阿媽,主要反映市場認可子公司嘅增長潛力比母公司更大,回顧子公司中海宏洋(081)市賬率亦曾明顯高過母公司中海外(688),就算近期中海宏洋股價大跌後,市賬率依然唔低過中海外。假設蒙牛市賬率4.2倍將維持不變,雅士利估值如果要貴過蒙牛,股價起碼升到6元樓上。
踏入12月,雅士利算係走勢偏弱嘅奶股,莫講話相比同業,相比濠賭、科網、半新股更加遠遠落後,究竟係整固,定係質素差所以相對同業天生落後?論基本因素實在難以相信佢係天生弱質,如果真係有料到,股價連番震倉後理應準備起跑。

晉佳
編按:智取大市暫代板塊尋寶一天
足本收睇《亂噏24》x 卓韻芝;跟住有錢國偉陪你夜蒲!
周一至周五《亂噏24》約定你: http://bit.ly/appletalk24